د زندانونو چارو د سمون ادارې د پالیسۍ او مسلکي چارو مرستیال د ادارې د نظامي چارو له مرستیال سره ناسته ترسره کړله
د زندانونو چارو د سمون ادارې نظامي مرستیال محترم لوی پاسوال قاري حبیب الله "بدر" د ادارې د پالیسۍ او مسلکي چارو له مرستیال محترم الحاج مولوي محمد کاظم "طارق" سره په لیدنه کې نوموړي ته د نوي ورسپارل شوي مسوولیت مبارکي وویله او په چارو کې یې ورته د بریا هیله وښوده.
داراز، محترم الحاج مولوي طارق او محترم قاري بدر په دې ناسته کې د زندانونو چارو د سمون ادارې لپاره په ګډه همکارۍ ټینګار وکړ او زیاته یې کړله چې د دې ادارې د پرسونل لپاره د ښه کاري چاپېریال رامنځ ته کولو او زندانیانو ته د ټولو شرعي او انساني حقونو په برابرولو کې به ګړندي ګامونه پورته کوي.
د زندانونو چارو د سمون اداره او مسوولین ژمن دي څو د هېواد په ټولو زندانونو کې ملکي او نظامي پرسونل او زندانیانو لپاره غوره اسانتیاوي رامنځ ته کړي.
رمضان المبارک ۱۶/ ۱۴۴۶
د مقام د دفتر ریاست
د اطلاعاتو او عامه اړیکو امریت
