ولایتي خبرونه (بامیان، سمنګان) بامیان ولایت د زندان د پرسونل او زندانیانو ترمنځ د سیرت النبي(صلی الله علیه وسلم) سیالۍ پای ته ورسېده
بامیان ولایت د زندان مسوولینو په وینا د دې ولایت په زندان کې د پرسونل او زندانیانو ترمنځ د سیرت النبي (صلی الله علیه وسلم) سیالۍ چې د یاد زندان د مسوولینو له لورې څو ورځې وړاندې پیل شوې وه، تېره ورځ د یولړ مراسمو په ترڅ کې پای ته ورسېده.
په دې اړه په جوړو شویو مراسمو کې چې د بامیان ولایت والي محترم مولوي عبدالله "سرحدي" او یو شمېر سمه ییزو مسوولینو برخه لرله، د نبوي (صلی الله علیه وسلم) سیرت زده کړې او دغه ډول روزنیزو برنامو په ارزښت خبرې وکړې.
داراز، د یاد زندان رئیس محترم مولوي محمد ابراهیم "حقاني" دغو مراسمو کې ګډونوالو ته وویل چې دا د هر مسلمان ځوان دنده ده چې د خپل محبوب پیغمبر (صلی الله علیه وسلم) د مبارک سیرت څخه ځان خبر کړي او په خپل ورځني ژوند کې یې عملي کړي.
په پای کې، د دې زندان د مسوولینو له لورې د دغې سیالۍ غوره زده کوونکو ته ډالۍ او ستاینلیکونه ورکړل شول.
د یوبل خبر له مخې، د سمنګان ولایت په زندان کې د محبوسینو او د توقیفیانو ترمنځ د مطالعې دود کولو په اړه سیالي ترسره شوه
په دغو سیالیو کې چې د یاد زندان (۱۳۰) تنو محبوسینو او توقیفیانو برخه اخیستې وه، په جوړو شویو مراسمو کې یې د زندان مسوولینو د پوهې د لوړولو په موخه مطالعه اړینه وبله او له هغوی څخه یې وغوښتل چې خپل وخت بې ځایه تېر نه کړي او د زده کړو په برخو کې له شته فرصتونو څخه پوره ګټه پورته کړي.
په ورته وخت کې، یادو توقیفیانو او محبوسینو هم د ورته سیالیو د برابرولو له امله مسوولینو څخه د مننې ترڅنګ ژمنه وکړله چې د زندان له خوا به په نورو جوړو شویو مثبتو پروګرامونو کې هم د تل په شان برخه واخلي.
هېره دې نه وې چې، د دې سیالۍ په پای کې د ازموینې په اخیستلو سره د (۱۰) تنو غوره ګډونوالو تر پېژندلو وروسته د هغوی د لا هڅونې په موخه پرې یو شمېر ډالۍ ووېشل شوې.
شعبان المعظم ۱۳ / ۱۴۴۶
د مقام د دفتر ریاست
د اطلاعاتو او عامه اړیکو امریت
