د زندانونو چارو د سمون ادارې تخنیکي او مسلکي کمېټې په خپله ناسته کې پر یو لړ مهمو حقوقي، تخنیکي او مسلکي مسایلو بحث او خبرې اترې وکړې
دغه ناسته، چې د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله "همدرد" په مشرۍ او د یادې کمېټې د مرکزي برخو غړو، رئیسانو په ګډون نن( دوشنبې) جوړه شوې وه، په کې ادارې پورې اړوند د یو شمېر مسلکي او تخنیکي چارو په هکله د شرعي او نافذه قوانینو په رڼا کې فیصلې وشوې.
د یادونې وړ بولو، چې د زندانونو چارو د سمون ادارې تخنیکي او مسلکي کمېټې د رامنځته کېدو موخه، د یادې ادارې د جوړو شویو کړنلارو، لایحو او لارښودونو ارزونه او د نویو لارښودونو طرح کول او نورو ناڅرګندو مسایلو څیړل، بحث کول او د تقنیني اسنادو پر بنسټ پرېکړې کول دي.
جمادي الثاني ۲۱/ ۱۴۴۶
د مقام د دفتر ریاست
د اطلاعاتو او عامه اړیکو امریت
