ولایتي خبرونه ( میدان وردګ، پکتیکا ) د میدان وردګ ولایت له زندانه څخه د سترې محکمې راغلي پلاوي لیدنه وکړه
د سترې محکمې څخه راغلي پلاوي د یادې لیدنې پرمهال له زندان امر محترم مولوي صلاح الدین سره د زندانیانو محاکماتي چارو او د دوسیو په اړه خبرې وکړې.
داراز پلاوي د میدان وردګ ولایت د زندان بندیانو سره په کتنه کې، د هغوی محاکماتي چارو او دوسیو په اړه ستونزې او غوښتنې واورېدې او د دوسیو د ژر څېړلو په موخه د دغه زندان مسوولینو سره لازمې مشورې وکړې.
په ورته وخت د میدان وردګ ولایت د زندان امر نوموړي پلاوي ته ډاډ ورکړ چې د زندانیانو محاکماتي چارو او دوسیو په برخه کې خپلو چارو ته چټکتیا ورکړي او په دې برخه کې به لا نورې اسانتیاوې هم برابري کړي.
د یو بل خبر له مخې، د پکتیکا ولایت د زندان امر او مل پلاوي د دې ولایت د ګومل او خیرکوټ ولسوالینو له توقیفخونو ليدنه وکړه
د دې ولایت د زندان امر محترم مولوي محمد هاشم "حقاني" او مل پلاوي تېره ورځ د نوموړي ولایت ګومل او خیرکوټ له توقیفخونو څخه د لیدنې پرمهال د یادو توقیفخونو له مسوولینو سره په اړوندو مسایلو خبرې وکړې.
همدا راز، پلاوي د نوموړو ولسوالیو د توقیفخونو له توقیفیانو سره ولیدل او هغوی هم له نوموړي پلاوي څخه د دوی د وضعیت او حال د ارزونې له کبله د مننې تر څنګ، د خپلو جرمي دوسیو د ژر څېړلو غوښتنه وکړه، چې د پلاوي له لورې د هغوی دې غوښتنې ته د رسېدنې، د هغوی د حقونو رعایتولو او ورته د لازمو اسانتیاوو د برارولو ژمنه وشوه.
شوال المکرم ۲۶/ ۱۴۴۵
د مقام د دفتر ریاست
د اطلاعاتو او عامه اړیکو امریت
