د زندانونو چارو د سمون ادارې عمومي رئیس د ایران د قضاییه قوې له پلاوي سره وکتل

محترم مولوي محمدیوسف "مستري" تېره ورځ په داسې حال کې، چې د دې ادارې د نظامي چارو مرستیال محترم لوی پاسوال قاري حبیب الله "بدر"، د مقام د دفتر رئیس محترم عبیدالله "اخلاص"، د مقام سلاکار محترم قاري رحمت الله " ګلزاد" او د دغې ادارې یو شمېر نورو مسوولینو، د عدلیې وزارت د مدني قوانینو رئیس مولوي عزیزالرحمن او د بهرنیو چارو وزارت د قونسلي چارو ریاست مرستیال محترم ډوکټور مولوي غلام حضرت "برهاني" هم شتون درلود، په کابل کې د ایران د قضاییه قوې له څلور کسیز پلاوي سره د دې کتنې پرمهال په افغانستان کې د زندانیانو د وضعیت په اړه خبرې اترې وکړې.
داراز، په دې کتنه کې د زندانونو چارو د سمون ادارې رهبرۍ او مسوولینو یاد پلاوي ته د دغې ادارې له خوا په ټولو محابسو، توقیفخونو او د ماشومانو د اصلاح او روزنې مرکزونو ښځینه او نارینه محبوسینو، توقیفیانو او محجوزینو لپاره د ژوندانه د برابرو شویو اسانتیاوو ترڅنګ، د دیني او عصري علومو، د کسب زده کړې او بیا روزنې لپاره یې د مثبتو برنامو په هکله هراړخیز معلومات ورکړل، چې د پلاوي د خوښۍ وړ وګرځېدل او ویې ویل: « د دې معلوماتو په اورېدو سره موږ ډاډه یوو چې دا اداره به زندانیانو ته د نورو ښو او مثبتو برنامو او بوختیاوو لپاره نور ګټور پلانونه هم ولري».
داراز، نوموړي پلاوي ژمنه وکړه چې د زندانونو چارو د سمون ادارې سره هر ډول مرستې او همکارۍ ته چمتو دي.
تر یادو خبرو اترو وروسته، دواړه لوري د کابل ولایت له نشه يي توکو سره د مبارزې توقیفخونې ته ولاړل او هلته یې له توقیفیانو سره د لیدنې پرمهال د هغوی د حال پوښتنه وکړه، چې یادو توقیفیانو هم له دوی سره د توقیفخونې د مسوولینو چلند ډېر ښه وګڼه او د افغانستان د زندانونو چارو د سمون ادارې او عدلي او قضايي اورګانونو څخه یې د مننې ترڅنګ، په توقیفخونه کې د دوی د ژوندانه اړوند چارو د لاښه مدیریت هیله څرګنده کړه.
له ایرانه د افغان زندانیانو د رالېږد کمېسیون د معلوماتو پربنسټ، دا مهال په ایران هېواد کې شاوخوا (۵) زره افغانان د بېلابېلو جرمونو په تور بندیان دي، چې د ا.ا.ا. د عالیقدر مشرتابه په سپارښتنه او شفقت او د یاد کمېسیون د هلو ځلو پرمټ تېرکال هم د (۳) پړاوونو په ترڅ کې د یو شمېر ښځینه وو په ګډون څه باندې (۱۱) سوه تنه افغان زندانیان افغانستان ته راولېږدول او د زندانونو چارو د سمون ادارې ته وسپارل شول.

رجب المرجب ۱۰/ ۱۴۴۵
د مقام د دفتر رياست
د اطلاعاتو او عامه اړيکو امريت