د بغلان ولایت د زندان لپاره نوي امر رسماً په کار پیل وکړ
د زندانونو چارو د سمون ادارې د عمومي رئیس محترم مولوي محمد یوسف "مستري" په مشرۍ او د دې ادارې د مقام د دفتر رئیس محترم عبیدالله "اخلاص" او د کورني تفتیش رئیس محترم مولوي فضل احمد "احمدي" په ګډون یوه صلاحیت لرونکي پلاوي بغلان ته د خپل رسمي سفر پرمهال، د یاد ولایت د زندان ملکي او نظامي پرسونل او مسوولینو ته د یو لړ مراسمو په ترڅ کې محترم مولوي سیدولي د دې زندان د نوي امر په توګه معرفي او د خیر د دعا په کولو یې ورته په چارو کې د بریا هیله وکړه.
داراز، محترم مولوي محمدیوسف "مستري" د نوموړي ولایت د زندان د مخکیني امر کړنې او فعالیتونه وستایل او د دې زندان پرسونل ته یې په خبرو کې له نوي امر سره د پوره همغږۍ او د چارو ښه پرمخ وړلو د سپارښتنې ترڅنګ وویل: « هیله مند یم چې محترم مولوي سیدولي به هم تر خپل لاس لاندې پرسونل سره ښه چلند کوي، له حاله به يې ځان تل خبروي او ستونزو ته به یې پرخپل وخت رسېدنه کوي».
همداشان، د ادارې د کورني تفیش رئیس محترم مولوي فضل احمد "احمدي" بیا د یادو مراسمو پرمهال خپلو خبرو کې د دې ادارې د مسوولینو ادلون بدلون لکه د نورو دولتي بنسټونو په شان د ښې حکومتولۍ یو اصل وګڼه او زیاته یې کړه، چې محترم مولوي سیدولي په کار پوه او تجربه لرونکی شخص دی او له دې وړاندې یې په پوره صداقت او امانت د زندانونو چارو د سمون ادارې په چوکاټ کې دنده ترسره کړې ده.
په ورته وخت کې، د بغلان ولایت د زندان نوي امر محترم مولوي سیدولي د زندانونو چارو د سمون ادارې له رهبرۍ څخه پر هغه د دې باور او اعتماد د مننې ترڅنګ ژمنه وکړه، چې ورسپارل شوي مسوولیتونه به په پوره امانتولۍ ترسره کوي.
د یادونې وړ بولو، چې محترم مولوي سیدولي تر دې مخکې د سمنګان ولایت د زندان د امر په توګه دنده لرله.
جمادي الثاني-۲۱/ ۱۴۴۵
د مقام د دفتر ریاست
د اطلاعاتو او عامه اړیکو امریت
