ولایتي خبرونه ( بدخشان، غزني، بغلان) د بدخشان ولایت په زندان کې د ( ۸۷) تنه زندانیان د دیني زده کړو له دورو څخه فارغ شول

د یاد زندان رئیس محترم درمحمد "صفدر" د نوموړو زندانیان فراغت غونډې ته د خپلو خبرو پرمهال په داسې حال کې، چې د بدخشان ولایت مرستیال والي، محترم قاري امین الله طیب، د امر بالمعروف اونهی عن المنکر، د سزا د دیوان محکمې رئیسانو،  او یو شمېر مسوولینو او ديني عالمان ګډون درلود، د دوی د فراغت مبارکي وویله او زیاته یې کړله، د زندانونو چارو د سمون ادارې د ښوونې او بیا روزنې ریاست د هېواد نورو زندانونو ترڅنګ دې زندان زندانیانو لپاره هم د زده کړو زمینه برابرې کړې او دغه لړۍ دوام لري.
د دې ولایت مرستیال والي محترم قاري امین الله "طیب" په خپلو خبرو کې زیاته کړله چې د ا.ا.ا. د هېواد ټولو وګړو ته هغه که په هر ځای کې وي، حقونو ته یې ژمن دی او په وخت ورته رسیدنه کیږي.
محترم قاري طیب زندانونو چارو د سمون ادارې له لورې زندانیانو ته د ښونیزو برنامو په پلې کولو خوښي وښوده او زیاته کړله چې نوموړو زندانیانو ته د زده کړو پرمټ به هغوی د بند مودې په پوره کېدو سره سم د هېواد په ابادۍ کې ونډه واخلي.
همداشان، یادې غونډې ته راغلو ګډونوالو په زندان کې د دا ډول برنامو پرمخ وړل یو مثبت ګام وباله او د زندان له رهبرۍ څخه یې د مننې تر څنګ د نورو دیني برنامو پر عملي کولویې ټینګار وکړ.
یاده غونډه د دیني زده څخه  فارغو شویو زندانیانو ته ستاینلیکونواو ډالیو په ورکړې او دعایې په کولو سره پایته ورسېده.

د یو بل خبر له مخې، د غزنې ولایت د زندان له محجوزینوسره د یونیسف موسسې له لورې د ژمنیو توکو سره مرسته وشوه

د یونیسف موسسې له لورې او د اقتصادي برنامو او ستراتېژیکو اړیکو ریاست په همغږۍ د دې ولایت د زندان په محجوزینو د اړوندو مسوولینو په حضور کې کمپلې وویشل شوې.
د زندان مسوولینو د یادې موسسې څخه په مننې کورنیو او نړېوالو بنسټونو څخه وغوښتل چې د ژمي په دې ساړه موسم کې نوموړي زندان سره مرستو ته دوام ورکړي.

بل لور بیا، د بغلان ولایت په زندان کې د فوټبال سیالۍ ترسره شوې 

د بغلان ولایت د زندان مسوولینو وايي د دې ولایت زندان د دوو بلاکونو د زندانیانو ترمنځ د فوټبال دوستانه سیالۍ ترسره شوې
د دې ولایت مسوولینو د یادو لوبو موخه د زندانیانو ترمنځ د ورور ګلوۍ فضا رامنځه کول او د هغوی جسمي، روحي ارامتیا او روغتیا پاملرنه یاده کړله او له زندانیانو څخه یې وغوښتل د زده کړو ترڅنګ ورزش ته هم پام وکړي.
داراز،  نوموړو زندانیانو د یادې لوبې په ترسره کولو یې خوښي وښوده او له نورو زندانیانو څخه یې غوښتنه وکړله چې د زده کړو ترڅنګ ورزش ته هم پاملرنه وکړي. 

رجب المرجب ۲۱/ ۱۴۴۶
د مقام د دفتر ریاست
د اطلاعاتو او عامه اړیکو امریت