د زندانونو چارو د سمون ادارې د صنعتي ریاست نوی رئیس وګومارل شو
د زندانونو چارو د سمون ادارې د رهبرۍ په سپارښتنه، د دغې ادارې د پالېسۍ او مسلکي مرستیال محترم قاري عبدالله "همدرد"، نن د یو لړ مراسمو په ترڅ کې، چې د څرخي پله مرکزي زندان رئیس محترم مولوي عطامحمد محمد او یو شمېر نورو مسوولینو هم شتون درلود، محترم مولوي اغا شاه د صنعتي ریاست لپاره د نوي رئیس په توګه د یاد ریاست پرسونل ته معرفي او د دعا په کولو یې د خدای(ج) له درباره ورته په چارو کې د بریا او پرمختګ هیله وکړه.
همداشان، محترم همدرد د یاد ریاست له پرسونل څخه له نوي رئیس سره د پوره همکارۍ او چارو ښه پرمخ وړلو توصیه وکړ، چې د نوموړي پرسونل له خوا هم د دوی له اړخه د هرراز همکارۍ ژمنه وشوه.
په ورته وخت کې، محترم همدرد د کابل د څرخي پله مرکزي زندان کې صنعتي مدیریت ته ولاړ او د یاد مدیریت د خیاطۍ، بوټ ګنډنې، حلبي سازۍ، غالۍ اوبدلو، ترکاڼۍ یا نجارۍ، وېلډېنګ کارۍ، فلزکارۍ، د برېښنا د تولید او بېلابېلې برخې له نږدې ولیدلې او مسوولینو ته یې د نوموړو برخو له ماشینونو او وسایلو څخه د بندیانو د سالمې بوختیا او ورته د کسب زده کولو لپاره د ګټې اخیستنې په اړه لازمې لارښوونې وکړې.
همداشان، د پالېسۍ او مسلکي مرستیال د صنعتي مدیریت مسوولینو سره په خبرو کې پرېکړه وکړه، څو هغه صنعتي برخې، ماشینونه، وسایل او د کسب زده کړې کارځایونه چې غیر فعال دي او هغه چې ترمیم او جوړولو ته اړتیا لري ترمیم او بیا فعال کړي.
د د زندانونو چارو د سمون ادارې د پالېسۍ او مسلکي مرستیال محترم عبدالله "همدرد" زیاته کړه، چې د یاد مدیریت د صنعتي برخې په بیا فعالولو سره به له یوې خوا بندیان کسب زده کړي، د بند موده به یې بېځایه تېره نه شي او له بلې خوا به د زده کړي کسب پرمټ عاید ترلاسه او خپلې اقتصادي ستونزې به پرې حل کړي.
د زندانونو چارو د سمون ادارې رهبري او مسوولين ژمن دي، چې په ورته ګامونو سره د خپلو چارو ګټورتوب او د ادارې پرسونل لپاره د اړتیا وړ امکانات برابر کړي، څو دا پرسونل وتوانېږي بندیانو، توقیفیانو او محجوزینو ته په بېلابېلو برخو کې مناسب او لازم خدمتونه وړاندې کړي.
جمادالاول ۶/ ۱۴۴۴
د اطلاعاتو او عامه اړیکو ریاست
