د زندانونو چارو د سمون ادارې يوه پلاوي د خوست ولایت له زندانه لیدنه وکړه
د زندانونو چارو د سمون ادارې د عمومي رئیس محترم مولوي محمديوسف "مستري" په سپارښتنه، د ادارې د ښوونې او روزنې رئیس محترم مولوي عبدالوارث "سادات" او د ارشاد او دعوت د رئیس محترم مولوي صديق الله "صديقي" په ګډون ټاکل شوی پلاوی، ياد ولايت ته ولاړ او هلته یې د زندان له مسوولینو سره د لیدنې په ترڅ کې د اړوندو مسایلو په اړه خبرې اترې کړې دي.
په ورته وخت کې، پلاوي د خوست زندان لپاره محترم عزیزالرحمان د نوي امنيتي مرستيال په توګه معرفي او په چارو کې يې ورته د برياوو هيله وکړه.
همداشان، پلاوي د ياد زندان له پخواني امنيتي مرستيال محترم نورولي شاه څخه د کړو خدمتونو له کبله مننه وکړه او د زندان له امنيتي پرسونل څخه يې نوي امنيتي مرستيال سره د لاښې همکارۍ او همغږۍ غوښتنه وکړه.
داراز، نوموړي پلاوي د خوست ولايت د زندان ښوونيز او روزنيز بهير ارزولی او د ښه والي لپاره يې مربوطه مسوولينو ته لازمې سپارښتنې کړې دي.
همداشان، پلاوي د ياد زندان له پرسونل او بنديانو سره هم له نږدې کتلي او هغوی ته يې د نېک چلند ترسره کولو، له بديو ډډه کولو او نورو اصلاحي مسايلو د په پام کې نيولو په موخه لارښوونې کړې، چې د پرسونل او بنديانو د خوښۍ لامل شوې دي.
دا لومړی ځل نه دی، چې د زندانونو چارو د سمون ادارې مسوولين د ازادۍ سلب مرکزونو څخه ليدنه کوي، بلکې تر دې وړاندې هم د ورته هڅو په ترڅ کې توانېدلي چې د بنديانو، توقيفيانو او محجوزينو له حاله ځان خبر، په بېلابېلو برخو کې يې ستونزې حل او په نوموړو مرکزونه کې یې ورته د اسانتياوو برابرولو ترڅنګ، ښوونيز، روزنيز او اصلاحي پروګرامونه پلې کړي.
ربېع الثاني۱۰/ ۱۴۴۴
د اطلاعاتو او عامه اړيکو ریاست
