د زندانونو چارو د تنظیم ادارې د رهبرۍ په وړاندیز او د ا.ا.ا د ریاست الوزراء عالي مقام په منظورۍ د غزني ولایت د زندان لپاره نوي رئیس په دنده وګومارل شو.
د زندانونو چارو د تنظیم ادارې د نظامي چارو مرستیال محترم لوی پاسوال الحاج محمد کاظم "طارق" له لوري د غزني ولایت زندان لپاره محترم مولوي خالقداد "رحمت" د نوي رئیس په توګه د یاد زندان پرسونل ته معرفي شو.
په دې اړه جوړو شویو مراسمو کې، د نظامي چارو مرستیال محترم لوی پاسوال محمد کاظم طارق په داسې حال کې، چې د کشف او اوپراتیفي رئیس محترم مل پاسوال عبدالشکور "طیب" او یو شمېر مسوولین ورسره ول د زندان د چارو پر لا ښه تنظیم، د امنیت د ټینګښت، اداري نظم او د محبوسینو د حقونو پر رعایت ټینګار وکړ او له نوي رئیس څخه یې وغوښتل چې خپله دنده د اسلامي اصولو، نافذه قوانینو او اداري مسوولیتونو په رڼا کې په پوره امانتدارۍ او ژمنتیا ترسره کړي.
دغه راز، محترم مولوي خالقداد رحمت هم د باور له امله د زندانونو چارو د تنظیم ادارې له مشرتابه څخه مننه او ژمنه یې وکړله، چې د غزني ولایت زندان د چارو د لا ښه مدیریت، د امنیت د پیاوړتیا او د محبوسینو د قانوني حقونو د خوندي کولو لپاره به په اخلاص او مسوولیت خپله دنده ترسره کړي.
تر دې وروسته، د زندانونو چارو د تنظیم ادارې نظامي مرستیال محترم لوی پاسوال الحاج محمد کاظم طارق په مشرۍ پلاوي د نوموړي زندان د پرسونل او زندانیانو لپاره د خوړو، اباتې، پخلنځي، کانتین، تعمیراتي او روغتیايي چارو وضعیت له نږدې وارزاوه او د ستونزو حلولو، لازمو اسانتیاوو برابرولو او روا غوښتنو ته د رسېدنې په موخه اړوندو مسوولینو ته لازمې لارښوونې وکړلې.
په پای کې، د نظامي چارو مرستیال محترم لوی پاسوال الحاج محمد کاظم طارق په مشرۍ پلاوي د غزني ولایت د زندان له امنیتي قراولونو، ټاورونو، او امنیتي پوستو څخه په جلا جلا توګه لیدنه وکړله او د یاد زندان د امنیت د لا ټینګښت په موخه یې امنیتي مسوولینو ته یولړ سپارښتنې هم وکړلې.
محرم الحرام ۱۴/ ۱۴۴۸
د مقام د دفتر ریاست
د اطلاعاتو او عامه اړیکو امریت
