د زندانونو چارو د سمون ادارې له روزنیزو مسلکي ۳ میاشتیني او ۲ میاشتیني کورسونو څخه د (۳۴) ولایتونو د زندانونو (۱۵۲) تنه نظامي پرسونل فارغ شول
د زندانونو چارو د سمون ادارې د تعلیمي مرکز قوماندانۍ له روزنیز او مسلکي کورس څخه چې د مرکز او (۳۳) ولایتونو د زندانونو (۱۱۶) تنو افسرانو او ساتنمنانو د ۳ میاشتینیو او د د ښوونې او بیا روزنې (۳۶) تنه امرینو د دوه میاشتنیو دورو په ترڅ کې د عقیدتي، د بندیانو د ساتلو، هغوی سره ښه چلند کولو، د هغوی د شرعي او انساني حقونو رعایتولو او د نظامي نظم او ډسپلین اړوند لازمې مسلکي زده کړې او روزنې ترلاسه او نن(چهارشنبې) یې د یو لړ مراسمو پرمهال د فراغت سندونه ترلاسه کړل.
د زندانونو چارو د سمون ادارې نظامي مرستیال محترم الحاج محمد کاظم "طارق" په داسې حال کې، چې د نظامي معاونیت د ارکان ر ئیس محترم پاسوال الحاج اسدالله "مولانا"، د نظامي ښوونې او روزنې د واحد قوماندانۍ قوماندان محترم مل پاسوال مولوي نورالله "دروېش"، د یادې ادارې یو شمېر رئیسانو او نورو ملکي او نظامي مسوولینو او پرسونل هم شتون درلود، نوموړ فارغانو ته په خپلو خبرو کې وویل: « تاسو ته زندانیان په دې نیت درسپارل شوي چې د هغوی په ښه پالنه او روزنه کې خپلې هڅې لا زیاتې او د اصلاح سبب وګرځی ».
محترم الحاج محمد کاظم "طارق" زیاته کړله، باید ټول مسوولین او موظفین هڅه وکړي چې له زندانیانو سره د نېکو او ښو اخلاقو پربنسټ چلند وکړي، ښه ساتنه او پالنه یې وکړي او د سالمې روزنې په موخه ورته د دیني، عصري او حرفوي زده کړو زمینه برابر کړي، څو دوی په راتلونکې کې د ناروا کړنو له ترسره کولو پښېمانه او د سالمو، پوهو او کاسبو وګړو په توګه خپلې کورنۍ او ټولنې سره یو ځای شي.
په ورته وخت کې، د دې ادارې له عدلي او قضایي اورګانونو سره د اړیکو رئیس محترم مولوي عبدالله "حقیق"، د کابل ولایت د مرکزي توقیفخونې رئیس محترم قاري محمد ګل "جګرخون" او د نظامي ښوونې او روزنې د واحد قوماندانۍ قوماندان محترم مل پاسوال مولوي نورالله "دروېش" د خپلو ویناوو په ترڅ کې نوموړو فارغانو ته په خطاب کې وويل: « تاسو ته درکول شوې دندې یو امانت دی او دا امانت هغه وخت پرځای کولی شئ، چې دلته له ترلاسه کړو زده کړو د هغو ښه ترسره کولو لپاره استفاده وکړئ او د شرعي او قانوني اصولو سره سم یې پر مخ بوځئ».
یاد مراسم، د زندانونو چارو د سمون ادارې د روزنیزو مسلکي کورسونو (۱۵۲) تنو ګډونوالو ته د فراغت د سند په توګه د تصدیق پاڼو پر ورکړې او د خیر د دعا په کولو سره پایته ورسېدل.
رجب المرجب ۲۴/ ۱۴۴۷
د مقام د دفتر ریاست
د اطلاعاتو او عامه اړیکو امریت
