د پکتیکا ولایت د زندان لپاره نوي امر په کار پیل وکړ
د زندانونو چارو د سمون ادارې د نظامي مرستیال محترم لوی پاسوال قاري حبیب الله "بدر " په داسې حال کې چې د نظامي چارو معاونیت د ارکان رئیس محترم الحاج پاسوال اسدالله "مولانا " یې ملتیا کوله پکتیکا ولایت ته په سفر ولاړ او هلته یې د یو لړ جوړو شویو مراسمو په ترڅ کې د ادارې له اړتیا سره سم محترم ملا حکمت الله چې تر دې مخکې د د زابل ولایت د زندان امر و، د پکتیکا ولایت د زندان د نوي امر په توګه د دې زندان پرسونل ته معرفي او نوموړي هم رسماً خپله دنده پیل کړه.
داراز، محترم لوی پاسوال قاري حبیب الله "بدر" د یادو مراسمو پرمهال خپلو خبرو کې وویل: « افغانستان زموږ او ستاسو ګډ کور دی او په هره برخه او منصب کې چې یوو نو خدمت کول یې پر موږ لازم دی او لکه څنګه چې د زندانونو مسوولیت یو دروند کار دی، نو زندانیانو ته خدمت کول هم لویې حوصلې او زغم ته اړتیا لري او زه ډاډه یم چې د دې ادارې ټول مسوولین ترې برخمن دي».
همداشان، د زندانونو چارو د سمون ادارې نظامي مرستیال د پکتیکا د زندان د پخواني امر خدمتونه او لاسته راوړنې وستایلې او نوي امر ته یې د دې زندان له پرسونل سره په ګډې همکارۍ او همغږۍ د مسوولیتونو د ښه ترسره کولو سپارښتنه وکړه.
په ورته مهال، د پکتیکا ولایت د زندان نوي امر محترم ملا حکمت الله د زندانونو چارو د سمون ادارې له رهبرۍ څخه پر هغه د باور کولو مننه وکړه او زیاته یې کړه چې موخه مې خپل هېواد ته خدمت کول دي، نو په دې برخه کې د مشرانو اطاعت کوم او راسپارل شوي مسوولیتونه به په پوره رېښتینولۍ او امانتدارۍ سرته رسوم.
ذوالحجة الحرام ۵/ ۱۴۴۵
د مقام د دفتر ریاست
د اطلاعاتو او عامه اړیکو امریت
