ولایتي لنډ خبرونه: (ننګرهار، میدان وردګ، پروان، بدخشان) د همکارو موسسو له لوري د ننګرهار ولایت له مرکزي زندان سره د اړتیا وړ توکو مرسته وشوه
د همکارو موسسو له لوري د ننګرهار ولایت مرکزي زندان سره د اړتیا وړ توکو د مرستې له جملې چې په کې د ځان مینځلو، جامو مینځلو توکو، ترڅنګ د ابوڅکلو ترموزونه، ستلونه، تشتونه، او د اړتیا وړ نور توکي شامل دي، د دې زندان مسوولینو ته وسپارل شول.
په ورته وخت کې، د نوموړي زندان رئیس وویل: «موږکوښښ کوو، څو په بېلابېلو برخو کې له ملي او نړیوالو مرستندویو بنسټونو مرستې جذب او په روڼه توګه یې په زندانیانو وویشو.
دا راز، د دغه زندان مسوولینو د یادو بنسټونو څخه د خوښۍ ترڅنګ یادې مرستې اړینې وبللې او ترخوا یې په نورو داخلي او نړیوالو بنسټونو هم غږ وکړ چې له دوی سره خپلو مرستو او همکاریو ته دوام ورکړي.
د یو بل خبر له مخې، د میدان وردګ ولایت د زندان مسوولینو تېره شپه د دې ولایت د سید اباد، چک، نرخ او جلریز ولسوالیو د توقیفخونو څخه د ليدنو ترڅنګ، د نوموړو توقیفخونو له مسوولینو سره پر اړوندو چارو خبرې وکړې.
داراز، د زندان مسوولینو د نوموړو توقیفخونو له توقیفیانو سره په لیدنه کې د هغوی ستونزې او روا غوښتنې ترې له نږدې واورېدې او د حل په موخه یې ورته ډاډ ورکړ.
همداراز، نوموړي پلاوي د یادو توقیفخونو له مسوولینو سره په لیدنه کې د هغوی ښه خدمتونه وستایل او توقیفیانو سره پر ښه چلند یې ټینګار وکړ.
همداراز د پروان ولایت د زندان رئیس په مشرۍ پلاوي د دې ولایت د سرخ پارسا او سیاګرد ولسوالیو له توقیفخونو د لیدنې ترڅنګ یې د یادو توقیفخونو مسوولینو سره په اړوندو مسایلو خبرې وکړې
داراز، د یاد ولایت د زندان رئیس په مشرۍ پلاوي د نوموړو توقیفخونو امرینو او توقیفانو سره ولیدل د هغوی ستونزې او غوښتنې یې واورېدې او حل په موخه یې نوموړو ټه ډاډ ورکړ.
بل لور بیا د بدخشان ولایت د زندان د رئیس په مشرۍ پلاوي د یاد ولایت د کشم ولسوالۍ د توقیفخونې څخه لیدنه وکړه او د یادې توقیفخونې له مسوولینو او پرسونل سره په اړوندو موضوعاتو خبرې وکړې
داراز، د دې زندان د رئیس په مشرۍ پلاوي د نوموړې توقیفخونې له توقیفیانو سره ولیدل او د هغوی ستونزو تر اورېدو وروسته د حل په موخه يې د یادې توقیفخونې مسوولینو ته لازمې لارښوونې وکړې.
په ورته وخت کې، د یاد زندان رئیس په مشرۍ پلاوي د دې ولایت د ابتدائیه محکمې له رئیس سره هم ولیدل او د توقیفانو محاکماتي چارو په اړه يې ورسره خبرې وکړې.
ذوالقعدة الحرام ۶/ ۱۴۴۵
د مقام د دفتر ریاست
د اطلاعاتو او عامه اړیکو امریت
