د زندانونو چارو د سمون ادارې یوه پلاوي د هلمند ولایت له زندانه لیدنه وکړه
د زندانونو چارو د سمون ادارې سرپرست او د پالېسۍ او مسلکي چارو مرستیال محترم قاري عبدالله "همدرد" په سپارښتنه، د ادارې د نظامي چارو معاونیت د ارکان رئیس محترم مولوي اسدالله "مولانا" په مشرۍ پلاوي، تېره ورځ د هلمند ولایت له مرکزي زندان څخه د لیدنې په ترڅ کې د یاد ولایت د زندان له مسوولینو سره د ځینو مربوطه موضوعګانو په هکله خبرې اترې وکړې.
همداشان ، د محترم مولانا په مشرۍ پلاوي د هلمند ولایت د زندان امنیتي او اداري شعبې، روغتیا، پخلنځی، خواړه، د څښاک اوبه او بېلا بېلې برخې ارزولي او د شتو ستونزو د حل لپاره یې له اړوندو مسوولینو سره سلا مشورې کړې دي.
داراز، پلاوي د دغه زندان د زندانیانو ستونزې او غوښتنې له نږدې واورېدې او اړوندو مسوولینو ته یې د ستونزو د حل په موخه لازمې لارښونې وکړې.
یاد پلاوي د هلمند ولایت د زندان مسوولینو سره په خبرو کې، د بندیانو لپاره د اسانتياوو پر زیاتولو، د هغوی ستونزو او روا غوښتنو ته د رسېدنې او د ښو خدماتو پر وړاندې کولو ټینګار وکړ او له زندانیانو سره یې د نوموړو مسوولینو ښه چلند وستایه.
شوال المکرم ۱۲ / ۱۴۴۵
د مقام د دفتر ریاست
د اطلاعاتو او عامه اړیکو امریت
