ولایتي خبرونه( کندهار -غزني- پکتیا) د کندهار ولایت له زندان سره د اوبو د تصفیې ماشینونو مرسته وشوه
د کندهار ولایت د زندان د مسوولینو په هڅو او د دې ولایت د یوه خیرخواه وګړي له لوري د دغه زندان له زندانیانو سره د اوبو د تصفیې او یخولو ۸ عدده ماشینونو مرسته وشوه.
د نوموړي ولایت د زندان مسوولین زیاتوي، یاد ماشینونه چې د ۷۰ ليټرو اوبو د تصفیې او یخولو ظرفیت لري دوی ته سپارل شوي او دوی هم د دې زندان په بلاکونو کې نصب کړي چې په وینا یې له دې سره به زندانیان له مختلفو ناروغیو څخه په امن او له پاکو او یخو اوبو څخه به برخمن شي.
همدا راز، د دې ولایت د زندان مسوولینو د یادې مرستې په موخه له نوموړي مننه وکړه او ترڅنګ یې په نورو داخلي او نړیوالو بنسټونو هم غږ وکړ چې له دوی سره خپلو مرستو او همکاریو ته دوام ورکړي.
د یو بل خبر له مخې، د غزني او پکتیا ولایتونو د زندانونو لپاره نوي نظامي مدیران په دنده وګومارل شول
د زندانونو چارو د سمون ادارې د عمومي رئیس محترم مولوي محمدیوسف"مستري" په سپارښتنه او د نوموړو ولایتونو د زندانونو د مسوولینو له لورې د پکتیا زندان لپاره محترم مولوي عزیزالرحمن او د غزني زندان لپاره محترم خان مسعود د سمونوال په بستونو کې د نوي نظامي مدیرانو په توګه د زندان پرسونل ته په جلا جلا توګه معرفي او رسماً یې په دې بستونو کې خپلې دندې پیل کړې.
داراز، په دې اړه په جوړو شویو مراسمو کې ویناوالو د نوموړي ولایتونو د زندان د مخکینيو نظامي مسوولینو کړنې او فعالیتونه وستایل او د یاد زندان له ملکي او نظامي پرسونل څخه یې له اوسنيو مسوولینو سره د همکارۍ او په ګډه د چارو ښه پرمخ وړلو غوښتنه وکړه.
همدا راز، نویو ګومارل شویو نظامي مدیرانو هم د ادارې له خوا دوی ته د دې مسوولیتونو د سپارلو له کبله مننه وکړه او زیاته یې کړه چې دا مسوولیت یو امانت دی او په ښه توګه د ساتلو ترڅنګ به ورسپارل شوې چارې پروخت ترسره کوي.
محرم الحرام ۲۹/ ۱۴۴۶
د مقام د دفتر ریاست
د اطلاعاتو او عامه اړیکو امریت
