ولایتي خبرونه: (ننګرهار، میدان وردګ، پکتیکا) د ننګرهار او میدان وردګ ولایتونو د زندانونو د امنیتي پرسونل او زندانیانو له خوا د تراوېح لمونځونو پرمهال د قرآن عظیم الشان ختمونه پایته ورسېدل
د دغو زندانونو مسوولینو په دې اړه په جلا جلا توګه د جوړو شویو مراسمو په ترڅ کې د روژې مبارکې میاشتې د فضلیتونو په هکله خبرې وکړې او ویې ویل: « دا چې دا میاشت د قرانکریم د نزول میاشت ده، نو د هغه تلاوت او نور عبادات د نورو میاشتو په پرتله ډېر ثواب او اجر لري او د مسلمانانو د نفس د تذکیې، اصلاح او تقوا لامل ګرځي».
د یادو مراسمو په پای کې، د نوموړو زندانونو پرسونل او زندانیانو د افغانستان د اوسني اسلامي نظام د بقا، په هېواد کې د امنیت، سولې، سوکالۍ، پرمختګ او یووالي د لا ښه ټینګښت لپاره د خیر دعاوې وکړې.
پکتیکا:
د پکتیکا ولایت د زندان مسوولینو په هڅو او د دې ولایت د تخنیکي او مسلکي تعلیماتو امریت سره په همغږۍ، د فلزکارۍ شاپ چې د یاد زندان (۳۰) تنو زندنیانو په کې برخه اخیستې وه او (۳) میاشتې یې دوام درلود تېره ورځ پای ته ورسېده.
د نوموړي ولایت د زندان مسوولینو په دې اړه د جوړو شویو مراسمو په ترڅ کې وویل، د دا ډول روزنيزو برنامو پلي کېدل د زندانیانو د بیا روزنې او سالمې بوختیا لپاره خورا اړین دي او زیاته یې کړه، چې هڅه کوي په راتلونکو کې به هم دا برنامې دوام ولري.
رمضان المبارک ۱۶/ ۱۴۴۷
د مقام د دفتر ریاست
د اطلاعاتو او عامه اړیکو امریت
