ولایتي خبرونه (ننګرهار، غزني، بامیان، پنجشیر، بغلان) د ننګرهار ولایت په زندان کې د دې ولایت د زندان ملکي او نظامي پرسونل د ظرفیت لوړونې درې ورځېنی سمینار پای ته ورسېده
دغه سمینار چې د ادارې د پرسونل د مسلکي مهارتونو لوړولو او د مسؤلیتونو لا ښه ترسره کولو په موخه جوړ شوی و، ګډونوالو ته د اداري اصولو، مسلکي اخلاقو، د محبوسینو د حقونو، د امنیتي تدابیرو، او د ورځنیو دندو د ښه ترسره کولو په پار د نوموړي زندان د ښوونې او بیا روزنې امریت د استادانو له لورې هر اړخیز معلومات ورکړل شول.
د دې ولایت د زندان رئیس محترم مولوي سهیل "سعید" د سمينار ګډونوالو ته د سمینار اهمیت ته اشاره وکړه او ویې ویل چې د دې ډول روزنیزو پروګرامونو دوام د اداري پرسونل د ظرفیت لوړولو لپاره اړین دي او له ګډونوالو څخه یې وغوښتل چې د ادارې اړوند زده کړل شوي مهارتونه په خپلو ورځنیو چارو کې وکاروئ، څو اداري چارې لا منظمې او مؤثرې مخ ته لاړې شي.
ورته مهال ګډونوالو د سمینار پر محتوا مثبته تبصره وکړه، او ویې ویل چې دا ډول روزنیز پروګرامونه د هغوی د مسلکي ودې لپاره خورا ارزښتناک دي او ډاډ یې ورکړ چې زده کړل شوي مهارتونه به د خپلو دندو د ښه ترسره کولو لپاره وکاروي.
د یوبل خبر له مخې، د غزني او بامیانو ولایتونو په زندانونو کې د روژې مبارکې میاشتې د رارسېدو په پار ملکي او نظامي پرسونل لپاره د قرآن کریم د ترجمې او تفسیر دوره پیل شوه
د زندانونو چارو د سمون ادارې رهبرۍ په سپارښتنه او د غزني او بامیانو ولایتونو د زندانونو مسوولینو په هڅو د ښوونیزو پروګرامونو په دوام، د روژې مبارکې میاشتې را رسېدو په پار د نوموړو زندانونو ملکي او نظامي پرسونل لپاره د قرآن کریم د ترجمې او تفسیر دورې بهیر پیل شو.
د یادو ولایتونو د زندانونو مسوولینو په دې اړه د جوړو شویو مراسمو پرمهال، د دیني زدهکړو پر ارزښت خبرې وکړې او دا یې د ادارې د پرسونل د فکري او اسلامي روحېې د لوړولو لامل وبلل.
همدا راز، نوموړو مسوولینو د یاد زندان ملکي او نظامي پرسونل او زندانیانو څخه وغوښتل، چې له دې طلايي فرصت څخه پوره ګټه واخلي او ټولنې ته د ښه خدمت کولو لپاره خپل ځانونه په دیني او عصري زده کړو سمبال کړي.
په ورته وخت کې، نوموړو ګډونوالو د یادې ادارې له مسوولینو څخه د مننې ترڅنګ د زدهکړو دا بهیر یې مثبته وګڼله او ورته د نورو ښوونیزو او روزنیزو برنامو پر دوام ټینګار وکړ.
باید یادونه وکړو چې د دې برنامو جوړولو موخه، د قرآن کریم په ترجمې د پوهې ترڅنګ، په دیني، اسلامي فکر او روحیې د ملکي او نظامي پرسونل سمبالول دي.
بل لور بیا، د پنجشیر ولایت له زندانه (۷) تنه له عفوې او تخفیف څخه برخمن شول
د پنجشیر ولایت د استیناف محکمې د ټاکل شوي پلاوي له خوا د زندانیانو د نسبتي دوسیو د کره ارزونې او د افغانستان د سترې محکمې د عالي مقام د حکم پربنسټ، یو شمېر هغه محبوسین چې د زندانونو چارو د سمون ادارې په هڅو یاد زندان کې چې په دیني، عصري او حرفوي زده کړو کې یې پوره ونډه اخیستې او بریالي شوي وو، خوشې او د حبس په موده کې له تخفیفه برخمن شول.
د دې ولایت د زندان مسوولین وايي، د دغه حکم له مخې د دې زندان (۶) تنو محبوسین د حبس پاتې موده عفوه او خوشې شول او د یو تن حبس په موده کې تخفیف ورکړل.
همداراز، د یاد زندان مسوولینو له لورې یادو خوشې شویو کسانو سره چې د دې ولایت والي او د محکمې مسوولینو هم حضور درلود، نغدي مرسته هم وشوه.
بل بخوا بیا، د بغلان ولایت د زندان ښځینه محبوسینو سره د یوناما دفتر له لورې مېنځلو توکو مرسته وشوه
په دغه مرسته کې چې شامپو، صابون، او د اړتیا وړ نور توکي شامل دي د یوناما استازو لخوا د دې زندان مسوولینو ته وسپارل شو.
داراز، د زندان مسوولینو د یوناما له استازو څخه د مننې ترڅنګ زیاته کړله چې دغه مرسته به په شفافه توګه په ښځینه محبوسینو وویشي.
شعبان المعظم ۲۶/ ۱۴۴۶
د مقام د دفتر ریاست
د اطلاعاتو او عامه اړیکو امریت
