د کندهار له زندانه د دغه ولایت د معتادینو د درملنې مرکز ته پرنشه یي توکو د روږدو کسانو لېږد، رسماً پیل شو
تېره ورځ د یو لړ مراسمو په ترڅ کې، چې د کندهار ولایت د مقام د دفتر رئیس محترم مولوي محب الله "ګرمسیري"، د یاد ولایت د مرکزِي زندان رئیس محترم ملا نعمت الله "سراجي"، د عامې روغتیا ریاست مرستیال محترم ډاکتر سید احمد "شاداب"، او یو شمېر نورو مسوولینو هم شتون درلود، کندهار کې د معتادینو د درملنې مرکز ته له نوموړي زندانه پرنشه يي توکو د روږدو کسانو د لېږد بهیر په رسمي توګه پیل شو. د کندهار ولایت د مقام د دفتر رئیس په دغو مراسمو کې د خبرو پرمهال وویل، د ا.ا.ا د عالیقدر مشرتابه د ځانګړې مهربانۍ او لارښوونې پربنسټ پرنشه يي توکو د روږدو کسانو د درملنې لپاره د کندهار ولایت په تخته پُل ولسوالۍ کې نوی لوی روغتیايي مرکز، چې په دې وروستیو کې پرانیستل شو په کې پرنشه يي توکو روږدو ناروغانو ته د خوراک، څښاک، ورزش کولو، روغتیا پالنې او درملنې لپاره ښه زمینه او امکانات برابر شوِي دي. دا راز، د کندهار د مرکزي زندان رئیس محترم ملا نعمت الله "سراجي" هم د یادو مراسمو ګډونوالو ته په خبرو کې وویل، دا مهال د کندهار په مرکزي زندان کې په نشه يي توکو شاوخوا(۱۲) سوه راوړل شوي کسان شتون لري، چې د یوې اونۍ په ترڅ کې به نوموړي مرکز ته د درملنې لپاره ولېږدول شي. هغه زیاته کړه، چې یادو روږدو کسانو ته لازمو خدمتونو وړاندې کولو او درملنې لپاره د کندهار ولایت د مرکزي زندان ترڅنګ، د کاراو ټولنیزو چارو، عامې روغتیا، ارشاد، حج او اوقافو، ټرانسپورټ، اطلاعاتو او کلتور، پوهنې او سره میاشت ریاستونو اړوندو برخو ته هم مسوولیتونه سپارل شوې دي. همداشان، د کندهار د عامې روغتیا ریاست مرستیال وویل، چي د نشه يي توکو روږدو کسانو د درملنې لپاره یې یاد نوي مرکز ته روغتیايي ټیمونه استولي او په کار یې پیل کړی. نوموړي زیاته کړه، چې دوی په دې وروستیو کې د کندهار ولایت په ۹مه ناحیه کې هم د معتادینو د درملني لپاره یو(۱۰۰) بستریز روغتون فعال کړی، چې په ۲۴ساعته توګه به دلته د معتادینو درملنه کېږي. د کندهار د عامې روغتیا ریاست مرستیال ډاډ ورکړ، چي د دې مرکز د پراخېدو په برخه کې يې په کابل کې د عامې روغتیا له وزارت سره خبرې کړې دي. ربېع الثاني- ۲۰/ ۱۴۴۴ د اطلاعاتو او عامه اړیکو ریاست
