د کابل ولایت څرخي پله مرکزي محبس کې د محبوسینو ترمنځ د فوټسال ټورنمنټ د نهم بلاک د لوبډلې په اتلوالۍ سره پای ته ورسېد
دغه ټورنمنټ چې د زندانونو چارو د سمون ادارې د ښوونې او بیا روزنې ریاست او د المپیک کمېټې، بدني روزنې او سپورت عمومي ریاست د ټول شموله ورزشونو امریت په تخنیکي همکارۍ د نوموړي محبس د (۷) بلاکونو د محبوسینو د فوټسال منتخبو لوبډلو ترمنځ پیل شوی و او شاوخوا (۴۵) ورځې یې دوام درلود، نن(سې شنبې) د پینځم او نهم بلاکونو د لوبډلو ترمنځ د پایلوبې په ترسره کولو او د نهم بلاک د لوبډلې له خوا د لومړي مقام په ترلاسه کولو پایته ورسېد.
د یادې پایلوبې لیدنې او هڅونې ته د زندانونو چارو د سمون ادارې ښوونې او بیا روزنې رئیس محترم مولوي نظر محمد "ناصري"، د اقتصادي برنامو او ستراتېژیکو اړیکو رئیس محترم عبیدالله "اخلاص"، د معلوماتي ټېکنالوژۍ رئیس محترم چهاریقل "ادیب"، د المپیک کمېټې، بدني روزنې او سپورت عمومي ریاست سلاکار، د کابل ولایت د بدنې روزنې او ورزش رئیس مولوي عتیق الله "خالد" او یو شمېر نور مسوولین او مینوال محبوسین راغلي وو.
د دې ادارې د ښوونې او بیا روزنې رئیس محترم مولوي نظر محمد ناصري په دې اړه جوړو شویو مراسمو پرمهال خبرو کې وویل، « زموږ زندانونه اوس په اصلاحي او روزنیزو مرکزونو بدل شوي او زندانیان ته دلته د زده کړو سربېره د ورزش زمینه هم برابره شوې ده».
همداراز، د کابل ولایت د بدني روزنې او ورزش رئیس محترم مولوي عتیق الله خالد زندانیانو ته د ورزش په بېلابېلو برخو کې د زمینې برابرولو له امله د زندانونو چارو د سمون ادارې د مسوولینو هڅې وستایلې او ژمنه وکړه، چې راتلونکې کې به د ورزش په برخه کې له دغې ادارې سره خپلو همکاریو ته دوام ورکړي.
په ورته وخت کې، د مرکزي محبس محبوسینو د زندانونو چارو د سمون ادارې له رهبرۍ او مسوولینو او د المپیک کمېټې، بدني روزنې او سپورت عمومي ریاست څخه دوی ته د ورزش د زمینې برابرولو له امله د مننې ترڅنګ، د دا ډول نورو ښو برنامو ترسره کول د هغوی د جسمي او روحي روغتیا لپاره اغېزمن یاد کړل او ژمنه یې وکړله، چې تل به په کې برخه اخلي.
د څرخي پله مرکزي زندان د محبس د فوټسال د ټورنمنټ د پایلوبې په اړه د مراسمو په پای کې، د زندانونو چارو د سمون ادارې او د المپیک کمېټې، بدني روزنې او سپورت عمومي ریاست مسوولینو او د محبوسینو د فوټسال لوبغاړو ته ستاینلیکونه، مډالونه، کپونه او ډالۍ هم ورکړل شوې.
جمادی الاول ۱۳/ ۱۴۴۷
د مقام د دفتر ریاست
د اطلاعاتو او عامه اړیکو امریت
