د کابل ولایت له نشه یي توکو سره د مبارزې توقیفخونې کې د قرآن عظیم الشان د ترجمې او تفسیر ختم ترسره شو
د روژې مبارکې میاشتې په پار د کابل ولایت له نشه یي توکو سره د مبارزې توقیفخونې کې توقیفیانو ته د قرآن عظیم الشان د ترجمې او تفسیر ختم په مراسمو کې د زندانونو چارو د سمون ادارې د ښوونې او بیا روزنې رئیس محترم مولوي نظرمحمد "ناصري" په داسې حال کې چې د کابل ولایت د نشه یې توکو پر وړاندې د مبارزې د ابتدایه محکمې رئیس مولوي حمدالله "احمدي"، او د ادارې یو شمېر نورو مسوولینو هم شتون درلود په خپلو خبرو کې وویل چې زندان د دیني عصري، حرفوي زده کړو، ورزشي برنامو او د ناوړه کړنو د برېښودلو او اصلاح ځای دی.
داراز، محترم مولوي ناصري د قرآن عظیم الشان د ترجمې او تفسیر د ختم په دې جوړو شویو مراسمو کې ګډونوالو توقیفیانو ته زیاته کړله که غواړئ چې له ناوړه کړنو لرې پاتې او د پوهو وګړو په څېر په ټولنه کې ژوند وکړئ نو د ادارې له لوري په داسې ګټورو برنامو کې ونډه واخلئ.
دغه راز، د کابل ولایت د ابتدایه محکمې رئیس مولوي حمد الله احمدي په یادو مراسمو کې په خپل وار سره توقیفیانو ته وویل چې د زندانونو چارو د سمون ادارې له لوري په دیني برنامو کې ګډون وکړئ څو الله ج درڅخه راضي او دا فکر مه کوئ چې تاسو دلته توقیفیان یاست الله تعالی تاسو ته د قران د زده کړې فرصت برابر کړی نو دا فرصت له لاسه مه ورکوئ ځانونه د قران کریم په زده کړې مصروف کړئ.
په ورته وخت کې، دغه مراسم د قران کریم د تفسیراو ترجمې استادانو ته د ښه تدریس په موخه د ډالیو او تصدیق پانو په ورکړې او د خیر دعا په کولو سره پای ته ورسېدل.
هېره دې نه وي، چې تر دغو مراسمو ورسته د توقیفیانو لپاره د عبدالله بن عباس (رض) په نوم د یوې مدرسې د پرانیستې ترڅنګ د سواد زده کړې برنامه او د ورزنش لپاره ځانګړي ځای هم وټاکل شو.
رمضان المبارک ۲۷/ ۱۴۴۶
د مقام د دفتر ریاست
د اطلاعاتو او عامه اړیکو امریت
