د کابل ولایت د څرخي پله په ښځینه محبس کې د یو روغتیایي کلینیک د جوړولو چارې پیل شوې

د زندانونو چارو د سمون ادارې د رهبرۍ په سپارښتنه او د ادارې د اقتصادي برنامو او ستراتېژیکو اړیکو د ریاست په هڅو او د (UNODC) موسسې په همکارۍ د کابل ولایت د څرخي پله په ښځینه محبس کې د یو روغتیایي کلینیک د جوړولو چارې پیل شوې.
د ادارې د اقتصادي برنامو او ستراتېژیکو اړیکو رئیس محترم ډاکټر سید احمد "اسحاقزي" په وینا یاد روغتیايي کلینیک به پرطبي وسایلو سمبال وي چې پرمټ به یې ښځینه محبوسینو ته د ښځينه ډاکټرانو او طبي متخصصینو له خوا روغتیايي خدمتونه وړاندې کېږي.
په ورته وخت کې، د (UNODC) موسسې پلاوي د کابل ولایت د توفیفخونې او ښځینه محبس د پایوازانو ته د لا اسانتیاوو رامنځ کولو په موخه د یوه سرپټې د جوړولو ژمنه هم وکړه چې د کابل ولایت د توفیفخونو رئیس محترم قاري محمد ګل "جګرخون" د نوموړې موسسې یاده چاره وستایله او زیاته یې کړه چې له دې سره به د پایوازۍ بهیر لا منظم او نوموړي به له موسمې بدلونونو څخه خوندي پاتې شي.
دا راز، نوموړي د یادې موسسې څخه د مننې ترڅنګ په نورو داخلي او نړیوالو همکارو بنسټونو هم  غږ وکړ چې له محبوسینو سره په مختلفو برخو کې خپلو مرستو او همکاریو ته دوام ورکړي.
 
د یو بل خبر له مخې، د همکارو بنسټونو له لوري د کابل ولایت د څرخي پله له ښځینه محبس سره د اړتیا وړ توکو مرسته وشوه
د زندانونو چارو د سمون ادارې د اقتصادي برنامو او ستراتېژیکو اړیکو ریاست په هڅو د دغه ولایت له ښځینه محبوسینو سره د (صف) همکارې موسسې له لوري د اړتیا وړ توکو مرسته وشوه چې د یاد محبس د مسوولینو له لوري په روڼه توګه په محبوسینو ووېشل شوه.
دا راز، د ادارې د اقتصادي برنامو او ستراتېژیکو اړیکو رئیس محترم ډاکټر سېداحمد "اسحاقزي" د (صف) موسسې له مسوولینو څخه د نوموړې مرستې په موخه د مننې ترڅنګ له نورو داخلي او نړیوالو همکارو بنسټونو څخه هم د دوامدارې مرستې او همکارۍ غوښتنه وکړه. 

شوال المکرم ۱۴/ ۱۴۴۵
د مقام د دفتر ریاست    
د اطلاعاتو او عامه اړیکو امریت