د کابل ولایت د څرخي پله مرکزي زندان له نظامي پرسونل څخه د ادارې په شپې لېسه کې د شاملېدو په موخه د ټولګي د تثبیت ازموینه واخیستل شوه
د زندانونو چارو د سمون ادارې د عمومي رئیس محترم مولوي محمدیوسف "مستري" په لارښوونه، د ادارې د ښوونې او بیا روزنې د رئیس محترم مولوي نظرمحمد"ناصري" په هڅو او د پوهنې وزارت په همکارۍ نن (چهار شنبې) په داسې حال کې چې د پوهنې وزارت د ازموینو د کمېټې رئیس محترم مولوي عبدالواحد "واحد یار" او مل پلاوي یې هم شتون درلود، د ادارې له شا او خوا (۳۱) تنو نظامي پرسونل څخه چې د مخه یې نوم لیکنه کړې وه په شپې لېسه کې د شاملېدو په هدف د ټولګي د تثبیت په موخه ازموینه واخیستل شوه.
د محترم مولوي ناصري په وینا:« یاده ازموینه د هغو نظامیانو لپاره ده چې په تېر کې یې د ځینو ستونزو له امله زده کړې نیمګړې پاتې شوې وې، د ادارې په هڅو مو ورته دا فرصت برابر کړی څو د پوهنې وزارت د یادې ازموینې له مخې د دوی د ټولګی تثبیت او په مختلفو ټولګیو کې به شامل شي چې د رسمیاتو څخه وروسته د ادارې په شپې لېسه کې خپلې زده کړې بشپړې کړي.
داراز، د پوهنې وزارت د ازموینو د کمېټې رئیس محترم مولوي عبدالواحد واحدیار په خبره، دغه ښوونځي کې د شاملېدو په موخه ګډونوال به د خپلې وړتیا له مخې په (لسم، یوولسم او دولسم) ټولګیو کې له ازموینې ورسته شامل او د ۱۲-ام ټولګي د بشپړولو ورسته به د پوهنې وزارت له لوري د فراغت سندونه ورکړل شي.
رجب المرجب ۱۴/ ۱۴۴۶
د مقام د دفتر ریاست
د اطلاعاتو او عامه اړیکو امریت
