د ننګرهار ولایت له زندان سره د سره صلیب نړيوالې کمېټې له لورې د حفظ الصحې او اړتیا وړ توکو مرسته وشوه
ولایتي خبرونه( ننګرهار، پکتیکا، میدان وردګ)
یاده مرسته، د زندانونو چارو د سمون ادارې د اقتصادي برنامو او ستراتېژیکو اړیکو ریاست په همغږۍ د سره صلیب نړیوالې کمېټې له لورې چې د کالیو مینځلو پودر، شامپو، صابون، خوړو دسترخوان، جارو، د اوبو سطلونه، د غاښونو کریم او برسونه، او د پاکۍ لپاره د اړتیا وړ نور توکي شامل ول، د یاد ولایت د زندان پر زندانیانو د یادې کمېټې د مسوولینو په حضور کې ووېشل شوه.
د دې زندان رئیس محترم مولوي سهیل "سعید" د نوموړې کمېټې څخه د مننې ترڅنګ، یادې مرستې اړینې وبللې او ترڅنګ يې په نورو کورنیو او نړیوالو بنسټونو هم غږ وکړ چې له دوی سره خپلو مرستو او همکاریو ته دوام ورکړي.
د یو بل خبر له مخې، پکتیکا ولایت د سروبي ولسوالۍ توقیفخونه فعاله او ګتې اخیستنې ته وسپارل شوه
د سروبي ولسوالۍ توقیفخونه د دې ولایت د مسوولینو په هڅو د یو لړ مراسمو په ترڅ کې فعاله او ګټې اخیستنې ته و سپارل شوه.
دا راز، د یاد ولایت د زندان امر محترم مولوي احسان الله "صلاح الدین" په خپلو خبرو کې وویل: نوموړې توقیفخونه په پاخه او معیاري ډول جوړه شوې او پرسونل او توقیفیانو لپاره لازمې اسانتیاوې برابرې شوي دي.
داراز، نوموړي زیاته کړه چې د یادې توقیفخونې فعالیدو سره تر ډیره بریده به د یادې ولسوالۍ د توقیفیانو ستونزې هوارې او چارو ته به یې پر وخت رسېدنه کیږي.
بلخوا بیا، د میدان وردګ د زندان نظامي مدیر او مل پلاوي یې د دې ولایت د سید اباد ولسوالۍ له توقیفخونې ليدنه وکړه
د دغه ولایت د زندان نظامي مدیر او مل پلاوي یې تېره ورځ د نوموړي ولایت د سید اباد ولسوالۍ له توقیفخونې څخه د لیدنې پرمهال د یادې توقیفخونې له مسوولینو سره پر اړوندو مسایلو خبرې اترې وکړې.
داراز، پلاوي د دغې ولسوالۍ د توقیفخونې له توقیفیانو سره ولیدل او هغوی هم له نوموړي پلاوي څخه د دوی د وضعیت او حال د ارزونې له کبله د مننې تر څنګ خپلې ستونزې او غوښتنې شریکې کړې چې د پلاوي له لورې د هغوی دې غوښتنو ته د رسېدنې او لازمو اسانتیاوو د برابرولو ژمنه وشوه.
محرم الحرام ۱۰/ ۱۴۴۷
د مقام د دفتر ریاست
د اطلاتو او عامه اړیکو امریت
