د زندانونو چارو د سمون ادارې یوه پلاوي د کابل ولایت د څرخي پله د مرکزي زندان د پرسونل او زندانیانو لپاره له پخلنځي څخه ليدنه وکړله
د نظامي چارو معاونیت د ارکان رئیس محترم پاسوال الحاج اسدالله "مولانا" په مشرۍ یوه پلاوي د دې ادارې له بېلابېلو برخو څخه د ارزونې په ترڅ کې دا ځل د کابل ولایت د څرخي پله د مرکزي زندان، توقیفخونې او د ادارې د پرسونل لپاره له پخلنځيو څخه ارزونه وکړله.
په دې ارزونه کې، د غذايي توکو د کیفیت او د پخولو د څرنګوالي په اړه له اړوندو مسوولینو او پخوونکو سره خبرې وشوې او نوموړو هم ورته لازم معلومات وړاندې کړل چې د یادو معلوماتو تر اورېدو وروسته یادو مسوولینو او پخوونکو ته د خوړو د کیفیت د لاښه کولو او د پاکۍ او نظافت پر پام کې نیولو باندې ټینګار وشو.
د زندانونو چارو د سمون ادارې رهبري او مسوولین، تل د هېواد د ټولو ولایتونو د زندانونو د بېلابېلو برخو د وضعیت ارزول، د مثبتو چارو غښتلتیا او ستونزو ته یې پروخت رسېدنه خپل مسوولیت ګڼي او په دې لاره کې خپلو هڅو ته دوام ورکوي.
ذوالقعده ۱۶/ ۱۴۴۶
د مقام د دفتر ریاست
د اطلاعاتو او عامه اړیکو امریت
