د خوست ولایت په زندان کې زندانیانو ته وړیا روغتیايي کمپ جوړ شو
د خوست ولایت د زندان د مسوولینو په هڅو او همکارۍ، د یاد ولایت د درملو خصوصي ټولنې له لوري د زندانیانو لپاره وړیا یو ورځنی روغتیايي کمپ جوړ شو.
په دغه روغتیايي کمپ کې زندانیانو ته روغتیايي معاینات ترسره او د اړتیا وړ درمل په وړیا توګه ورکړل شول، چې د زندانیانو د روغتیايي ستونزو په تشخیص او درملنه کې یې مهمه مرسته وکړله.
د خوست ولایت د زندان امر محترم مولوي ذبیح الله "طلحه" د درملو خصوصي ټولنې له مسوولینو څخه د زندانیانو سره د روغتیايي خدمتونو د وړاندې کولو له امله مننه او قدرداني وکړله.
نوموړي دغه راز له نورو خیریه بنسټونو، سوداګرو او مرستندویه ادارو وغوښتل چې د زندانیانو د روغتیا، زده کړو، حرفوي روزنې او نورو اړینو برخو کې ورته بشري او خیریه مرستې او همکارۍ ترسره کړي.
د زندانونو چارو د تنظیم اداره تل هڅه کوي چې د دغې ادارې د بودجې سربېره د اړوندو ادارو او خیریه بنسټونو په همکارۍ، محبوسینو او محجوزینو ته د روغتیايي، تعلیمي او حرفوي خدمتونو د وړاندې کولو زمینه لا پراخه کړي.
ربیع الاول ۲۹/ ۱۴۴۸
د مقام د دفتر ریاست
د اطلاعاتو او عامه اړیکو امریت
