د ا.ا.ا. د زندانونو چارو د سمون ادارې عمومي رئیس او مل پلاوي د ترکیې هېواد د زندانونو ادارې عمومي رئیس سره ولیدل.
د ا.ا.ا د زندانونو چارو د سمون ادارې عمومي رئيس محترم الحاج مولوي محمد یوسف "مستري" په استانبول کې د ا.ا.ا. جنرال قونسل محترم مفتي محمد عظيم "عظيمي" په ملتیا د زندانونو د روزنې او اصلاح يا(ICPA) نړيوال کنفرانس په څنډه کې د نوموړي هېواد د زندانونو ادارې د عمومي رئيس محترم انیس یاووز "ییلدریم" او د هغه له مرستیال محترم فاتح سره ولیدل.
په ليدنه کې دواړو لوريو په ترکيه کې د افغان زندانیانو او افغانستان ته یې د رالېږد او نورو اړوندو مسایلو په اړه خبري اترې او سلا مشورې وکړې.
په ورته وخت کې، د ترکيې هېواد د زندانونو ادارې عمومي رئيس د افغانستان د زندانونو چارو د سمون ادارې عمومي رئیس او د افغان زندانیانو د رالېږد کمېټې غړي سره په مربوطه برخو کې د همکاری ژمنه وکړله.
جمادي الاول ۷/ ۱۴۴۷
د مقام د دفتر ریاست
اطلاعاتو او عامه اړیکو امریت
