د زندانونو چارو تنظیم ادارې د نظامي ښوونې او روزنې واحد قوماندانۍ روزنیز مرکز څخه د امنیتي قطعې (۴۰) تنه ساتونکي او ساتنمنان فارغ شول
په دغه یو میاشتني کورس کې د امنیتي قطعې ساتونکو او ساتنمانو ته د نوموړي مرکز تجربه لرونکو استادانو له لورې په نظري او عملي توګه د عقیدتي، د بندیانو د ساتلو، هغوی سره ښه چلند کولو، د هغوی د شرعي او انساني حقونو رعایتولو او د نظامي نظم او ډسپلین اړوند لازمې مسلکي زده کړې او روزنې ترلاسه او د یو لړ مراسمو پرمهال د فراغت سندونه ترلاسه کړل.
د زندانونو چارو د تنظیم ادارې د نظامي معاونیت د ارکان ر ئیس محترم پاسوال الحاج اسدالله "مولانا"په داسې حال کې، چې د دغې ادارې د ولایتونو سره د اړیکو رئیس محترم مولوي عبد الحی " اخندزاده "، د ښوونې او بیا روزنې رئیس محترم مولوي نظر محمد "ناصري"د نظامي ښوونې او روزنې واحد قوماندانۍ قوماندان محترم مل پاسوال مولوي نورالله "دروېش"، د یاد ښوونیز مرکز استادانو، ملکي او نظامي مسوولینو او پرسونل هم شتون درلود، نوموړو فارغانو ته په خپلو خبرو کې وویل: هغه زده کړې مو چې دلته زده کړي په اړوندو چارو کې یې عملي او په ښه توګه ترې ګټه پورته کړئ.
محترم پاسوال الحاج اسد الله مولانا زیاته کړله، باید ټول مسوولین او موظفین هڅه وکړي چې له زندانیانو سره د نېکو او ښو اخلاقو پر بنسټ چلند وکړي، ښه ساتنه او پالنه یې وکړي او د سالمې روزنې په موخه ورته د دیني، عصري او حرفوي زده کړو زمینه برابر کړي، څو دوی په راتلونکې کې د ناروا کړنو له ترسره کولو پښېمانه او د سالمو، پوهو او کاسبو وګړو په توګه خپلې کورنۍ او ټولنې سره یو ځای شي.
په ورته وخت کې، د دې ادارې د ښوونې او بیا روزنې رئیس محترم مولوي نظر محمد "ناصري"او د نظامي ښوونې او روزنې د واحد قوماندانۍ قوماندان محترم مل پاسوال مولوي نورالله "دروېش" د خپلو ویناوو په ترڅ کې نوموړو فارغانو ته په خطاب کې وويل: « تاسو ته درکول شوې دندې یو امانت دی او دا امانت هغه وخت پرځای کولی شئ، چې دلته له ترلاسه کړو زده کړو د هغو ښه ترسره کولو لپاره استفاده وکړئ او د شرعي او قانوني اصولو سره سم یې پر مخ بوځئ».
یاد مراسم، د زندانونو چارو د تنظیم ادارې د روزنیزو مسلکي کورس(۴۰) تنو ګډونوالو ته د فراغت د سند په توګه د تصدیق پاڼو پر ورکړې او د خیر د دعا په کولو سره پایته ورسېدل.
ربیع الاول ۲۵/ ۱۴۴۸
د مقام د دفتر ریاست
د اطلاعاتو او عامه اړیکو امریت
