د زندانونو چارو د سمون ادارې عمومې رئیس د یونیسف له عمومي مشرې او مل پلاوي سره په خپل کاري دفتر کې وکتل
محترم الحاج مولوي محمد یوسف "مستري" په داسې حال کې، چې د ادارې یو شمېر رئیسانو او مسوولینو هم شتون درلود، د ملګرو ملتونو د ماشومانو د ملاتړې صندق (یونیسف) د عمومي مشرې مېرمن شیما سین ګوپتا او د هغې د مرستیالې، د سیمې په کچه او د افغانستان لپاره د یونیسف د مسوولینو په ګډون مل پلاوي سره یې وکتل.
په دې کتنه کې دواړو لوریو، د زندانونو چارو د سمون ادارې تر چتر لاندې په ټولو ښځینه محابسو کې د ښځینه محبوسینو، د هغوی د کوچنیانو او د ماشومانو د اصلاح او روزنې مراکزو د محجوزینو د ښوونې او روزنې، سالمې تغذیې، روغتیا، کسب زده کړو او نورو اړینو مسایلو په اړه خبرې اترې او د نظرونو تبادله وکړله.
داراز، په دې کتنه کې د زندانونو چارو د سمون ادارې عمومي رئیس یاد پلاوي ته وویل: « دلته موږ د هغو ښځینه محبوسینو، په ځانګړې توګه امېدوارو او هغو محبوسو میندو چې خپل اولادونه یې د دوی په خوښه له دوی سره اوسېږي مناسب خواړه ورکوو، اولادونو ته یې د وچو شیدو او نور روغتیايي توکي ورکوو ښه او پروخت روغتیايي خدمتونه ورته وړاندې کوو او هم هغو ماشومانو محجوزینو ته چې د ماشومانو د اصلاح او روزنې په مرکزونو کې اوسېږي د روغتیا، تغذیې، د دیني او عصري ښوونې او روزنې، ورزش او کسب زده کړو په برخو کې د اسانتیاوو سربېره مو د ژوند نور اړین امکانات په واک کې ورکړي، چې لله الحمد له امله یې مو ښې لاسته راوړنې لرلې دي».
د یونیسف دفتر عمومي مشرې او مل پلاوي يې د یادو معلوماتو په اورېدو د خوښۍ په څرګندولو ژمنه وکړله، چې دوی به د محبوسو میندو او ورسره اولادونو او په نوموړو مرکزونو کې له محجوزینو سره د خوراکي او غیر خوراکي او ژمنیو توکو د مرستو ترڅنګ، د هغوی په ښوونیزه او روزنیزه برخه کې هم لازم او له اړتیا سره سم امکانات برابر کړي.
په ورته مهال، د زندانونو چارو د سمون ادارې عمومي رئیس محترم الحاج مولوي محمد یوسف "مستري" وویل، دا اداره هم ډاډ درکوي چې د یونیسف له خوا مرسته کېدونکي توکي به پر ښځینه محبوسینو، د هغوی پر اولادونو او محجوزینو باندې په پوره شفافیت ویشل او د یادو امکاناتو پر بنسټ به لازمې برنامې، مناسبې او مثبتې عملي کړي.
ربېع الاول ۲۲/ ۱۴۴۷
د مقام د دفتر ریاست
د اطلاعاتو او عامه اړیکو امریت
