ولایتي خبرونه: (پکتیا، بادغیس، پکتیکا) د پکتیا ولایت د زندان په کلنیک کې د غاښونو څانګه پرانېستل شوه
یاده څانګه، د نوموړي ولایت د زندان رئیس محترم قاري عبدالغني "عادل" په هڅو، چې په کې د غاښونو کلنیک اړوند مجهز توکي موجود دي ګټې اخیستنې ته وسپارل شوه.
د دې زندان رئیس په وینا، په دغه کلنیک کې زندانیانو ته د غاښونو ډکول، کښل، اعصاب ایستنه، پوښول، صفا کول او همدا شان نور اړوند خدمات ترسره کیږي.
د دې ولایت د زندان زندانیانو د نوموړې څانګې په جوړیدو یې خوښي وښوده او د زندان له مسوولینو څخه ځانګړي مننه وکړله.
بادغیس:
د بادغیس ولایت د زندان امر په مشرۍ یوه پلاوي د دې ولایت د جوند، غورماچ او بالامرغاب ولسوالیو له توقیفخونو څخه ليدنه وکړله
د دې ولایت د زندان امر محترم ملا سید باران "عدالتي" او مل پلاوي د نوموړي ولایت د جوند، غورماچ او بالامرغاب ولسوالیو له توقیفخونو څخه د لیدنې پرمهال د یادو توقیفخونو له مسوولینو سره په اړوندو مسایلو خبرې وکړې.
داراز، پلاوي د نوموړو ولسوالیو د توقیفخونو له توقیفیانو سره ولیدل او هغوی هم له نوموړي پلاوي څخه د دوی د وضعیت او حال د ارزونې له کبله د مننې تر څنګ خپلې غوښتنې شرېکې کړې، چې د پلاوي له لورې د هغوی دې غوښتنو ته د رسېدنې، د هغوی د حقونو رعایتولو او ورته د لازمو اسانتیاوو د برابرولو ژمنه وشوه.
پکتیکا:
د پکتیکا ولایت په زندان کې د زندانیانو ترمنځ د واليبال ټورنمنټ پيل شو
د یاد ولایت د زندان په انګړ کې د زندانیانو شپږو ټیمونو ترمنځ د واليبال ټورنمنټ پيل شو، چې موخه یې د زندانيانو د ذهني سکون، سالمې او مثبتې بوختيا سربېره د اصلاح او روزنې د بهير د پياوړتيا په برخه کې يو مهم ګام بلل کېږي.
د پکتیکا ولايت د زندان امر محترم مولوي احسان الله "صلاح الدین" وويل؛ د دې ډول ورزشي کړنو تنظيم د زندانيانو پر روحي حالت مثبتې اغېزې لري او دا ډول پروګرامونه د زندانيانو د بيا ټولنيز کېدو او مثبت بدلون په برخه کې هم مهم رول لري.
ذوالقعده ۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
