د کابل له نشه يي توکو سره د مبارزې توقیفخونې ۶۵ توقیفیان له یوې ښوونیزې دورې څخه فارغ شول
د زندانونو چارو د سمون ادارې پورې اړوندې د کابل له نشه يي توکو سره د مبارزې توقیفخونې توقیفیانو ته د ادارې د ښوونې او روزنې ریاست له خوا د دیني او شرعي علومو د زده کړې له برابر شوي پروګرام څخه ۶۵ تنه توقیفیانو د زده کړې لومړۍ دوره تمامه او د یو لړ مراسمو په ترڅ کې ورته په دې پروګرام کې د ګډون له امله مننلیکونه ورکول شول.
په دې مراسمو کې، چې د ادارې د ښوونې او روزنې رئیس محترم مولوي عبدالوارث سادات، د ارشاد او دعوت رئیس محترم مولوي صدیق الله صدیقي، د هېواد د عدلي او قضايي اورګانونو او د نوموړې توقیفخونې یوشمېر مسوولینو شتون درلود، وینا والو یې د یادې ښوونیزې دورې ګډوالو ته په خبرو کې وویل: « تاسو باید له دې فرصت څخه ډېره ګټه واخلئ، دیني او شرعي علوم ښه زده کړئ، په خپلو ورځنیو چارو کې ترې ګټه واخلئ او نورو ته یې هم ورزده کړئ».
د یادولو وړ بولو، چې د زندانونو چارو د سمون ادارې پورې اړوندې د کابل له نشه يي توکو سره د مبارزې توقیفخونه کې د دغو زده کړو بهیر په دوامداره توګه جاري دی او توقیفیان په کې په ډېرې لېوالتیا او مینې برخه اخلي.
ربېع الثاني ۲۸/ ۱۴۴۴
د اطلاعاتو او عامه اړیکو ریاست
