د زندانونو چارو د سمون ادارې رهبرۍ پلاوي فراه ولایت ته سفر وکړ

د دغې ادارې د عمومي رئیس محترم مولوي محمد یوسف "مستري" په مشرۍ یو لوړپوړي پلاوي فراه ته د خپل سفر په ترڅ کې، د ياد ولایت د زندان له مسوولینو او پرسونل سره وکتل او پر اړوندو مسایلو يې خبرې اترې وکړې.
نوموړو مسسوولینو په دې خبرو اترو کې، د فراه د زندان د وضعیت، د زندانيانو د هوساينې لپاره د ترسره شویو فعالیتونو او راتلونکو پلانونو په اړه خپل معلومات شریک کړل، چې د پلاوي مشر یې تر اورېدو وروسته ستاينه وکړه او مسوولینو ته يې د نورو ګټورو فعاليتونو او په راتلونکو پلانونو کې د یاد ولایت د محکومونو، توقیفیانو او محجوزینو لپاره د لانورو اسانتیاوو په پام کې نيولو اړوند لازمې سپارښتنې وکړې.
دا راز، د زندانونو چارو د سمون ادارې عمومي رئیس او مل پلاوي یې د فراه د زندان د ښوونیزو او اصلاحي پروګرامونو، اداري او کاري شعبو، روغتیايي، اعاشوي او اباتوي خدمتونو، رغنیزو چارو، کشفي فعاليتونو او امنیتي ټاورونو او پوستو وضعيت له نږدې وارزاوه او مربوطه مسوولین یې په دې برخو کې د پاملرنې زیاتولو ترڅنګ، د محبوسينو، توقیفیانو او محجوزینو د بشري او اسلامي حقونو رعایتولو او د هغوی د جرمي دوسیو د پروخت تعقیبولو په موخه د زمينې برابرولو ته ځير کړل.

ذوالقعده ۲۵/ ۱۴۴۴
د مقام د دفتر ریاست
د اطلاعاتو او عامه اړیکو امریت