د زندانونو چارو د سمون ادارې رهبرۍ پلاوي د هېواد د سترې محکمې له صلاحیت لرونکو استازو سره د یوې ځانګړې غونډې پرمهال پر یو لړ مهمو مسایلو خبرې وکړې
د زندانونو چارو د سمون ادارې د پالېسۍ او مسلکي مرستیال محترم قاري عبدالله "همدرد" په داسې حال کې، چې د ادارې نظامي مرستیال محترم پاسوال قاري حبیب الله "بدر"، د مقام سلاکار محترم مولوي اسدالله "مولانا"، د کابل د زندانونو چارو د سمون رئیس محترم مولوي عبدالله "حقیق" او د مرکزي برخو یوشمېر نورو مربوطه رئیسانو شتون درلود نن( چهارشنبې) د یوې ځانګړې غونډې په ترڅ کې، د افغانستان د سترې محکمې د جزا د دیوان له رئیس محترم مفتي عتیق الله او د تفتیش ریاست مرستیال محترم مفتي عبدالولي سره وکتل او د بندیانو پر اړوندو مسایلو یې خبرې اترې وکړې.
دواړو خواوو په یاده غونډه کې، د ازادۍ سلب مرکزونو ته د متهمینو او محکومینو د جذب، تسلیمۍ او ازادېدو په بهیر کې د محاکماتي چارو پر وړاندې د ننګونو او حللارو په اړه له حقوقي، مسلکي، تخنیکي او شرعي اړخه هراړخیز بحث او نظرونه تبادله کړل.
د زندانونو چارو د سمون اداره هڅه کوي، څو د هېواد له عدلي او قضايي اورګانونو سره په همکارۍ د بندیانو، تورنو او محجوزینو دغې مهمې غوښتنې ته د رسېدنې، یعنې د دوسیو پروخت څېړلو لپاره لازمې قانوني حللارې او اسانتیاوې برابرې کړي.
ربېع الثاني ۷/ ۱۴۴۴
د اطلاعاتو او عامه اړیکو ریاست
