د هرات ولایت مرکزي ښځینه زندان کې د یو روغتیايي کلینیک چارې پیل شوې
د زندانونو چارو د سمون ادارې د عمومي رئیس محترم مولوي محمد یوسف "مستري" په سپارښتنه او اړتیا ته په کتو سره د هرات ولایت د زندان د مسوولینو په هڅو د دې ولایت په ښځینه محبس کې د ښځينه بندیانو لپاره د روغتیایي ستونزو د حل په موخه د یو روغتیایي کلینیک او تر څنګ یې د یاد ولایت په زندان کې د اوبو د یوې ذخیرې جوړولو چارې پیل شوې.
د هرات ولایت د زندان رئیس محترم ملا محمد نبي "خلیل" وویل: د یاد کلنیک او د اوبو ذخیرې لپاره پخوا ځایونه ځانګړي شوي وو چې دا دی نن یې د زندانونو چارو د سمون ادارې په مالي لګښت چارې پیل او په بشپړېدو سره به یې د دې زندان د زندانیانو د څښاک او پاکو اوبو د نشت او د ښځینه بندیانو روغتیايي ستونزي ژر او په وخت هواري شي.
همداراز د هرات د زندان رئیس زیاته کړه چې د همکارو موسسو په همکارۍ د دې ولایت د ښځینه زندانیانو لپاره د خیاطۍ، اشپزۍ او یو شمېر نورو برخو کې کورسونه جوړ شوي، چې پر مټ یې یادې ښځینه زندانیانې کولای شي مختلف ډوله خواړه تیار او د خیاطۍ په برخه کې بېلابېل کالي ډیزاین او جوړ کړي.
ذو القعده- ۹/ ۱۴۴۴
د مقام د دفتر ریاست
د اطلاعاتو او عامه اړیکو امریت
