د ننګرهار له زندانه ۱۴ تنه بندیان خوشې شول
د ننګرهار له مرکزي زندان څخه ۱۴ تنه بندیان، چې د دغه ولایت د عدلي او قضايي اورګانونو له خوا یې جرمي دوسیې څېړل شوې وې او د بند موده یې بشپړه شوې وه، تېره ورځ په قانوني او اوصولي توګه خوشې شول.
د یاد زندان مسوولینو په دې اړه د جوړو شویو مراسمو په ترڅ کې له نوموړو ازادو شویو کسانو څخه د اسلامي ارشاداتو په رڼا کې د وینا پرمهال وغوښتل، څو هڅه وکړي د ټولنې د نظم خرابوونکو اعمالو له ترسره کولو څخه ډډه وکړي.
د زندانونو چارو د سمون اداره کوښښ کوي، څو د هېواد له عدلي او قضايي اورګانونو سره په همکارۍ د بندیانو، تورنو او محجوزینو دغې مهمې غوښتنې ته د رسېدنې، یعنې د دوسیو پروخت څېړلو لپاره لازمې قانوني حللارې او اسانتیاوې برابرې کړي.
رجب المرجب ۲/ ۱۴۴۴
د اطلاعاتو او عامه اړیکو ریاست
