د زندانونو چارو د سمون ادارې عمومي رئیس په کابل کې د (یو ان ومن) دفتر له مشرې سره ولیدل

د زندانونو چارو د سمون ادارې عمومي رئیس محترم الحاج مولوي محمد یوسف "مستري" د افغانستان لپاره د (یو ان ومن) له مشرې مېرمن ډیویډ سن الیسن میریم او مل پلاوي سره په لیدنه کې د ښځینه محبوسینو سره په همکاریو زیاتولو خبرې وکړې.

په دې لیدنه کې، د زندانونو چارو د سمون ادارې عمومي رئیس محترم الحاج مولوي محمدیوسف "مستري" په داسې حال کې، چې د دې ادارې د مقام د دفتر رئیس محترم قاري رحمت الله"ګلزاد"، د ښوونې او بیا روزنې رئیس محترم مولوي نظرمحمد "ناصري"، د اقتصادي برنامو او ستراتېژیکو اړیکو رئیس محترم عبیدالله "اخلاص" او د روغتیا رئیس محترم ډاکټر سیداحمد "اسحاقزي" هم شتون درلود، د مېرمن ډیویډ سن الیسن میریم په مشرۍ (۶) کسیز پلاوي ته د ښه راغلاست ویلو ترڅنګ زیاته کړله:« که زندانیان د زندانه د باندې په ټولنه کې په هر جرم نیول شوي، اوس دلته له موږ سره امانت دي او د دې ادارې مسوولینو د نوموړو د ښې ساتنې، پالنې او انساني حقونو پاملرنه کړې، روغتیايي، اعاشوي، اباتوي، ښوونيزو او روزنیزو، حرفوي، ورزشي او نورو اړتیا وړ برخو کې یې لازمې اسانتیاوې ورته برابرې کړي او د لا غوره چوپړتیاوو د جمتو کولو په پار نه ستړې کېدونکې هلې ځلې کوي.

دا راز، د زندانونو چارو د سمون ادارې عمومي رئیس محترم الحاج مولوي مستري د (یو ان ومن) دفتر له پلاوي سره په خبرو کې د ګډې همکارۍ په زیاتولو خبرې وکړې او له نوموړو یې د ښځینه محبوسینو لپاره د ښوونیزو ورکشاپونو او حرفوي زده کړو لپاره د خامو موادو برابرولو، روغتیایي تجهیزاتو او د ښځینه محبوسینود ماشومانو لپاره چې عمرونه یې د (۱) کال څخه تر (۳) کلونو پورې وي او له نوموړو سره په محبس کې اوسیږي د لا غوره غذایي موادو برابرولو، د زونونو په سطحه په زندانونوکې د روغتیايي مرکزونو د جوړولو په برخه کې د ملاتړ غوښتنه وکړله.

په ورته مهال، په افغانستان کې د (یو ان ومن)  دفتر مشرې مېرمن ډیویډ سن الیسن میریم ژمنه وکړله چې د زندانونو چارو د سمون له ادارې سره به د یادو برخو د پلې کولو په موخه هڅې وکړي.

رجب المرجب ۲۱/ ۱۴۴۶

د مقام د دفتر ریاست

د اطلاعاتو او عامه اړیکو امریت