د کابل ولایت د ماشومانو د اصلاح او روزنې په مرکز کې د (۱۳۵) تنو محجوزین د اته میاشتیني حرفوي زده کړو او (۳۶) تنو د سیرت النبي (صلی الله علیه وسلم) د ازموینې ممتازو زده کوونکو په پار ستاینغونډه ترسره شوه
په دې اړه په جوړو شویو مراسمو کې د زندانونو چارو د سمون ادارې د نظامي چارو مرستیال محترم لوی پاسوال قاري حبیب الله "بدر" په داسې حال کې چې د ادارې د نظامي چارو د ارکان رئیس محترم پاسوال الحاج اسدالله "مولانا"، د ماشومانو د اصلاح او روزنې مرکز رئیس محترم مولوي شرافت الله "حقاني"، د ښوونې او بیا روزنې رئیس محترم مولوي نظر محمد "ناصري"، د اقتصادي برنامو او ستراتېژیکو اړیکو رئیس محترم عبیدالله "اخلاص"، د ښاري يوهنې رئیس محترم مولوي عیدالباثت "حقاني"، د اشیانې موسسې مسوول محترم یوسف "حسین پور" او یو شمېر نورو مسوولینو په ګډون جوړه شوې وه یادو محجوزینو ته د مبارکۍ ترڅنګ زیاته کړه چې د زندانونو چارو د سمون اداره د زندانیانو، توقیفیانو او محجورینو لپاره د غوره خدمتونو د برابرولو په موخه کوښښ کوي او د نوموړو د حقوقو د لا خوندیتوب په پار یې د ا.ا.ا. د مشرتابه (حفظ الله) ۳۹ ماده ېز فرمان په ښه توګه عملي کړی دی.
داراز، محترم قاري بدر زیاته کړه چې زندانونه د ربړونې ځای نه بلکې د اصلاح او روزنې ځای دی چې دلته د دیني، عصري او حرفوي زده کړو پر مټ به محجوزین وکولای شي د خپلې بند مودې تر پای ته رسېدو وروسته د یو سالم وګړي په توګه ټولنې ته د خدمت وړ وګرځي.
همداراز، د کابل ولایت د ماشومانو د اصلاح او روزنې مرکز رئیس محترم مولوي شرافت الله حقاني په خپلو خبرو کې زیاته کړه؛ دا چې د ماشومانو د اصلاح او روزنې مرکز د محجوزینو د روزنې او د زده کړې چارې په غاړه لري نو تل مو کوښښ کړی چې نوموړي په ښه فکر او روحیه وروزي څو په راتلونکي کې و کولای شي له ناوړه کړنو لرې پاتې او د خپلو هېواد او کورنۍ لپاره د ښه خدمت جوګه شي.
همدا شان ، محترم مولوي حقاني په خبره یادې سیالۍ د (۳۶) ممتاز زده کوونکو ترڅنګ (۱۳۵) تنه نور محجوزین د اته میاشتیني د مختلفو حرفوي زده کړو څخه هم فارغ کړي چې پر مټ به یې له دې مرکز څخه په وتلو سره سم وکولای شي خپلې کورنۍ ته حلاله روزي وګټي.
په ورته وخت کې، د زندانونو چارو د سمون ادارې د ښوونې او بیا روزنې رئيس محترم مولوي نظر محمد ناصري د حضرت محمد مصطفی (صلی الله علیه وسلم) پر سیرت د خبرو ترڅنګ د یاد مرکز له مسوولینو څخه مننه وکړه چې د محجوزینو لپاره یې د سیرت النبي (صلی الله علیه وسلم) برنامه برابره کړې چې له دې سره به دوی وکولی شي د خپل خوږ پیغمبر (صلی الله علیه وسلم) له سیرت سره اشنا او د نوموړي مبارک سیرت په ژوند کې عملي کړي.
همدا راز، نوموړي زیاته کړه چې د تل په څېر کوښښ کوي څو د زندانیانو، توقیفیانو او محجوزینو د بیا روزنې په موخه دیني، عصري، حرفوي او ورزشي برنامې په لاره واچوي څو هغوی هم فکري، هم روحي او هم جسمې روغتیا ترلاسه کړي.
همداشان، د یادو مراسم په ترڅ کې یو شمېر زده کوونکو خپلې چمتو کړې ترانې، نعتونه او مقالې ګډون والو ته ولوستلې چې د حاضرینو له لوري یې تود هرکلی وشو.
په پای کې، د یاد مرکز د مسوولینو ته د محجوزینو په لاس جوړ شوي بوڼونه او د سیرت النبي (صلی الله علیه وسلم) د سیالۍ یو شمېر ممتازو زده کوونکو ته د فراغت په توګه تصدیق پاڼې او ډالۍ هم ووېشل شوې.
ربیع الاول ۲۰/ ۱۴۴۶
د مقام د دفتر ریاست
د اطلاعاتو او عامه اړیکو امریت
