ولایتي خبرونه( غزني- تخار) د غزني د مرکزي زندان رئیس د ای سي ار سي له سیمه ییز مسؤول سره ولیدل
د یاد زندان رئیس محترم قاري عبدالغني "عادل" د دې ولایت لپاره د سره صلیب نړیوالې کمېټې له سیمه ییز مسؤول سره ولیدل او پر یو لړ مسایلو یې خبرې وکړې.
په دغو خبرو کې محترم قاري عادل لومړی یادې کمېټې سره یو ځل بیا په دغه زندان کې د پرسونل او بندیانو ستونزي او یو لړ غوښتنې شریکې کړې، چې د کمېټې د مسؤول له خوا ورسره په دې برخه کې د همکارۍ ژمنه وشوه.
د یو بل خبر له مخې، د غزني ولایت د زندان یو تن پایواز د نشه يي توکو د لېږد په تور ونیول شو
یو تن پایواز، چې غوښتل يې په ماهرانه توګه ځای پر ځای کړي یو اندازه نشه یي توکي (شیشه) په میوه کې (کیوي) کې یاد ولایت زندان ته ولېږدوي، د دغه زندان د امنیتي او کشفي اورګانونو له خوا د کره تلاشۍ پرمهال کشف، ضبط او له لېږدوونکي سره یوځای د یوې دوسیې په ترڅ کې رسماً اړوندې برخې ته د لا نورو څېړنو لپاره وسپارل شو.
بل لور بیا، د تخار ولایت د زندان کارکوونکو ته د بشري حقونو په اړه یو ورځنی سیمینار ترسره شو
دغه سیمینار چې په افغانستان د ملګرو ملتونو مرستندویې ادارې (یوناما) له لورې جوړ شوی وو، د یوې ورځې په موده کې ګډونوالو ته د بشري حقونو او د کاري چارو ښوالې او ظرفیت لوړونه په موخه هر اړخېز معلومات وړاندې شول.
همدا شان، تخار ولایت د زندان مسوولینو هم دا ډول پروګرامونه د ادارې د کارکوونکو د پوهې لوړونې په هدف غوره وبلل او ګډنوال یې تشویق کړل څو په غور سره ترې ګټه پورته کړي.
همداراز د یوناما د بشري حقونو د برخې ولایتي مسوول د دې ولایت د زندان له امر سره ولیدل او د بشري حقونو په اړه یې ورسره خبرې وکړې.
د یوناما د بشري حقونو ولایتي مسوول په دې لیدنه کې ژمنه وکړه چې د بشري حقونو په اړه د عامه پوهاوي په برخه کې به هراړخیزه همکاري وکړي.
شعبان المعظم- ۱۰/ ۱۴۴۵
د مقام د دفتر ریاست
د اطلاعاتو او عامه اړیکو امریت
