ولايتي خبرونه( غزني، ننګرهار، بادغیس) د غزني او ننګرهار ولایتونو له زندانونو څخه سلګونه تنه زندانیان خوشې او د سلګونو تنو د بند په موده کې تخفیف راوستل شو
د عالیقدر امیرالمؤمنین شیخ القرآن والحدیث مولوي هبة الله "اخندزاده"(حفظه الله) د شفقت او مهربانۍ له مخې د سزا د عفوې او تخفیف د فرمان او د سترې محکمې د حکم په اساس ځیني زندانیان چې په دیني او عصري زده کړو کې یې برخه اخیستې او ښه ځلیدلي وو (۲۱۵) تنو ته عفوه او (۳۵۹) تنه نور هم له تخفیف څخه برخمن شول.
په دې اړه په جوړو شویو مراسمو کې د غزني ولایت والي محترم مولوي عبد الصمد "جاوید" په داسې حال کې چې د یاد ولایت یو شمېر ملکي او نظامي مسوولینو هم ګډون درلود په خپلو خبرو کې د دوی د ازادېدو له امله مبارکي وویله او له هغوی یې وغوښتل، څو په راتلونکې کې له ناوړه او د قانون خلاف کړنو څخه لاس په سر او په زندان کې له ورکړل شویو دیني، عصري او حرفوي زده کړو څخه په ګتې اخیستنې خپلې کورنۍ او ټولنې ته د خدمت جوګه شي.
د غزني ولایت د زندان رئیس محترم مولوي محمد نور "بلال شاهین" په وینا د دې ولایت له زندانه (۹۲) تنو ته عفوه او (۱۶۱) تنو ته د بند په موده کې تخفیف او د ننګرهار ولایت د زندان د رئیس محترم مولوي سهیل "سعید" په وینا له یاد زندان څخه (۱۲۳) تنو زندانیانو ته عفوه او (۱۹۸) تنو ته د بند په موده کې تخفیف ورکړل شو.
د یو بل خبر له مخې، د یونسیف موسسې له لوري د بادغیس ولایت د ماشومانو د اصلاح او روزنې له مرکز سره د یو اندازه حفظ الصحي توکو مرسته وشوه.
داراز، د دې ولایت د زندان امر محترم ملا سید باران "عدالتي" د دغې مرستې په موخه د خوښۍ څرګندولو ترڅنګ دغه مرستې اړینې وبللې او تر خوا یې په نورو داخلي او نړیوالو بنسټونو هم غږ وکړ چې له دوی سره خپلو مرستو او همکاریو ته دوام ورکړي.
شعبان المعظم ۲/ ۱۴۴۶
د مقام د دفتر ریاست
د اطلاعاتو او عامه اړیکو امریت .
