د کندز ولایت په زندان کې (۱۲۷) تنه زندانیان د محمدیه دارالعلوم له مدرسې څخه د قران کریم حفظ او ناظرې، نوراني قاعدې، او کسب زده کړو له روزنېزو برنامو څخه فارغ شول
د نوموړي زندان مسوولینو د یادې دورې محبوسینو او محجوزینو فراغتغونډې ته د خپلو خبرو پرمهال په داسې حال کې، چې د یاد ولایت والي محترم مولوي نصر الله "مطیع"، د زندانونو چارو د تنظیم ادارې د مقام د دفتر رئیس محترم قاري رحمت الله"ګلزاد"، د ولایتونو سره د اړیکو رئیس محترم مولوي عبد الحی " اخندزاده "، د ښوونې او بیا روزنې رئیس محترم مولوي نظر محمد "ناصري"، د یاد زندان رئیس محترم ملا نعمت الله "سراجي" د یاد ولایت د امر بالمعروف، علماو شورا، د عدلي او قضايي اورګانونو رئیسانو او یو شمېر نورو ځايي مخورو او مسوولینو هم ګډون درلود، د دوی د فراغت مبارکي وویله او زیاته یې کړله، چې په پام کې لري په دې زندان کې نورو دیني ښوونیزو برنامو ته مناسبه زمینه هم برابره کړي.
همداشان، د یاد زندان رئیس د غوڼدې پرمهال زیاته کړله، زمونږ هڅه دا ده، چې زندانیانو لپاره دې ته ورته نورې اصلاحي او روزنیزې برنامې په لاره واچوو څو د هغوی د اصلاح او سمون سبب وګرځي.
همهاله، د یادې غونډې ویناوالو، د قرآن عظیم الشان په فضیلت او د بنديانو د اصلاح په اړه خبرې وکړې او د حفظ، ناظرې دورو او زده کړو دوامدار تنظيم او ترتیب یې نيک ګام وباله او زياته يې کړله، چې زندان د مجرمینو د ژوند لپاره يو تربيتي پړاو دی، نو بايد دوی د خپلې اصلاح لپاره کار وکړي او دا یې هم وویل؛ چې په زندان کې دې د دا ډول برنامو پرمخ وړل یو مثبت ګام دی او د زندان له رهبرۍ څخه یې د مننې تر څنګ د نورو دیني برنامو پر عملي کولو ټینګار وکړ.
د معلوماتو له مخې، د کندز ولایت په زندان کې د ديني او کسب زده کړو برنامو له لارې (۱۲۷) تنه زندانیان فارغ شول، چې له دې جملې څخه (۴)تنه د قران کریم د حفظ، (۳۵)تنه زندانیان د قرآن کریم د ناظرې، (۶۱)تنه د نوراني قاعدې او د لمانځه زده کړو او (۲۲)تنو د کسب زده کړو دورې بشپړې کړې.
باید یادونه وکړو، هغو څلور تنو محبوسینو، چې د قران کریم حفظ دوره یې په بریالیتوب سره بشپړه کړې وه، د سترې محکمې د حکم پر بنسټ د بند پاتې موده ورته عفو او خوشې شول.
په پای کې، یادو فارغ شویو زندانیانو ته د فضیلت پګړۍ پر سر تړلو سره یاد مراسم د خیر دعا په کولو سره پای ته ورسېدل.
محرم الحرام ۲/ ۱۴۴۸
د مقام د دفتر ریاست
د اطلاعاتو او عامه اړیکو امریت
