ولایتي خبرونه: (بامیان، کندوز) د بامیان ولایت والي د دې ولایت له زندان څخه لیدنه وکړه
د بامیان ولایت په زندان کې د کارکوونکو او زندانیانو ترمنځ د (امارت پېژندنې) تر سرلیک لاندې د کتاب د مطالعې سیالي د دې زندان د ښوونې او بیا روزنې د مسوولینو له خوا په پوره شفافیت د ازموینې په اخیستلو پایته ورسېده.
د یاد ولایت والي محترم الحاج قاري ګل حیدر "شفیق"، د نوموړي زندان رئیس محترم مولوي عبد الرحیم "احمد" او یو شمېر نورو مسوولینو او ویناوالو په دې اړه جوړو شویو مراسمو کې د وینا پرمهال د مطالعې د ارزښت په اړه خبرې وکړې او له زندانیانو یې وغوښتل، چې په دې زندان کې د دیني او عصري علومو او کسب زده کړو په بهیر کې لکه د تل په شان ښه ونډه واخلي، په غور ورته پام وکړي او دلته خپل وخت بېځایه ضایع نه کړي.
د یادو مراسمو په پای کې د نوموړې ازموینې بریالیو ګډونوالو ته تشویقي ډالۍ ورکړل شوې.
کندوز:
د کندوز ولایت په د زندان کې د زندانیانو لپاره د بایوميټریک سیسټم فعال شو
دا نوی سیسټم چې د زندانیانو د دقیق او برېښنایي ثبت لپاره جوړ شوی، تېره ورځ رسم په کار واچول شو.
د یاد ولایت د زندان رئیس محترم ملا نعمت الله "سراجي وایي، د دغه سیسټم له لارې به د هر زنداني ځانګړي فزیکي او مهم معلومات ثبت او مدیریت شي، چې په خبره یې دا سیسټم د زندانیانو د چټکې پېژندنې او د قانوني پروسو په ترسره کولو کې لا زیاتې اسانتیاوې رامنځته کوي.
د یادونې وړ ده، چې په دې سیسټم کې د زندانیانو په اړه ثبت شوي معلومات خوندي ساتل کېږي.
رجب المرجب ۲۳/ ۱۴۴۷
د مقام د دفتر ریاست
د اطلاعاتو او عامه اړیکو امریت
