ولایتي خبرونه( پروان، ارزګان) د پروان ولایت په زندان کې د زندانیانو او پرسونل ترمنځ د سیرت النبي(صلی الله علیه وسلم) سیالۍ پای ته ورسېده
د نوموړي ولایت د زندان مسوولینو په وینا د دې ولایت په زندان کې د پرسونل او زندانیانو ترمنځ د سیرت النبي (صلی الله علیه وسلم) سیالۍ چې د یاد زندان د ښوونې او بیا روزنې مدیریت له لورې په لاره اچول شوې وې د یولړ مراسمو په ترڅ کې پای ته ورسېده.
په دې اړه جوړو شویو مراسمو کې، د یاد ولایت د زندان رئیس محترم مولوي عبدالرحیم "احمد" او شمېر نورو مسوولینو برخه لرله، د محمد (صلی الله علیه وسلم) سیرت زده کړې او دغه ډول روزونکو برنامو په ارزښت خبرې وکړې.
د نوموړي زندان رئیس وویل: دا د هر مسلمان ځوان دنده چې د خپل محبوب پیغمبر (صلی الله علیه وسلم) د مبارک سیرت څخه ځان خبر کړي او په خپل ورځني ژوند کې یې عملي کړي.
د غونډې پر دوام یو شمېر زندانیانو خپلې لیکنې، مقالې او ویناوې وړاندې کړې او يادي ویناوې د ګډونوالو له لوري وستایل شوې او د زندانیانو فکري او دیني استعدادونه یې په ډاګه کړل.
د یادونې ده، چې په یاده سیالۍ کې (۱۵۰)تنو زندانیانو برخه اخیستې او په شفافه توګه ترې ازموینه واخیستل شوه.
د یو بل خبر له مخې، د ارزګان ولایت د زندان مسوولینو د دې ولایت د چوری ولسوالۍ له توقیفخونې څخه د لیدنې ترڅنګ یې د نوموړې توقیفخونې له توقیفیانو سره هم ولیدل او د دوی ستونزو د هواري په موخه يې اړوندو مسوولینو ته لازمې لارښوونې وکړې.
د دغه ولایت د زندان مسوولینو د نوموړي ولایت د چوری ولسوالۍ له توقیفخونې څخه د لیدنې ترڅنګ د یادې توقیفخونې لپاره نوی نظامي مدیر پروسونل ته معرفي او په چارو کې ورته د بریالیتوب هیله وکړه.
محرم الحرام ۴/ ۱۴۴۷
د مقام د دفتر ریاست
د اطلاعاتو او عامه اړیکو امریت
