ولایتي خبرونه (میدان وردګ، غزني، زابل) د میدان وردګ ولایت په زندان کې د ا.ا.ا. پېژندنې سیالۍ ممتازو زنداني ګډونوالو لپاره ستاینغونډه جوړه شوه
یاده سیالۍ چې د دغه ولایت د زندان د مسوولینو له لوري جوړه او څو ورځې د مخه یې له یو شمېر زنداني ګډونوالو څخه د ارزونې په موخه ازموینه اخیستل شوې وه، نن یې په ممتازو ګډونوالو په جوړه شوې ستاینغونډه کې چې د دې ولایت یو شمېر ملکي او نظامي مسوولینو هم شتون درلود د ستاینې ترڅنګ ډالۍ ووېشل شوې.
د یاد زندان امر محترم مولوي صلاح الدین په وینا، د دغې سیالۍ موخه د دولت او رعیت تر منځ د واټن ختمول او د زندانیانو سالمه بوختیا یاده کړله.
په پای کې د دې سیالۍ ممتاز ګډونوالو ته ډالۍ ورکړل شوې.
د یو بل خبر له مخې، د غزني ولایت د ماشومانو د اصلاح او روزنې له مرکز سره د زندانونو چارو د سمون ادارې د ستراتېژیکو اړیکو ریاست په همغږۍ سره د یونیسف موسسې له لوري د ژمنیو توکو مرسته وشوه.
په دغې مرسته کې ژمنۍ ګرمې جامې، بوټونه، جمپرونه، جورابې، کمپلې او داسې نورو لازم توکي شامل وو چې د یاد زندان د مسوولینو له لوري په محجوزینو په روڼه توګه وویشل شول.
په ورته وخت کې، د دغه زندان مسوولینو د یادې مرستندویه ادارې څخه د مننې ترڅنګ یادې مرستې اړینې و بللې او په نورو کورنیو او نړیوالو بنسټونو یې غږ وکړ چې د ژمي په سخت موسم کې د نوموړو لاسنوی او خپلو مرستو ته دوام ورکړي.
بل لور بیا، زابل ټرافیکو مدیریت له لورې د مرکزي زندان پرسونل ته د موټر چلونې جوازونه ورکړل شول
د زندان امر محترم مولوي محمد هاشم حقاني په وینا، د موټر جلونې په ۱۵ ورځني کورس کې د نوموړي زندان ۵۰ تنو ملکي او نظامي پرسونل ګډون کړې و، چې له ډلې یې ۳۵ تنه د نظري او عملې اموزینې وروسته بریالي شول او د موټر چلونې جوازونه ترلاسه کړل.
جمادي الثاني ۳۰/ ۱۴۴۶
د مقام د دفتر ریاست
د اطلاعاتو او عامه اړیکو امریت
