د کابل ولایت د ماشومانو د اصلاح او روزنې مرکز کې یو شمېر رغنيزې چارې بشپړې شوې
د زندانونو چارو د سمون ادارې تر چتر لاندې ودانیو ته د پاملرنې په ترڅ کې دا ځل، د یاد مرکز د محجوزینو د اوسېدو د خونو او د کمپیوټرلب ټولګي د رنګمالۍ ترڅنګ، د هغه دېوال د جوړېدو چارې هم پایته ورسېدې چې د کابل ښاروالۍ په همغږۍ د ښاري ماسټرپلان له مخې دې مرکز ته څېرمه د سړک جوړولو او پراخولو لپاره نړول شوی و.
د زندانونو چارو د سمون ادارې د تعمیراتو رئیس محترم حاجي عبدالرحمن "عابد"وايي، د کابل ولایت د ماشومانو د اصلاح او روزنې مرکز یادو رغنیزو چارو کې دوه امنیتي ټاورونه او د یوشمېر نورو برخو رغونې هم شاملې دي.
نوموړي زیاته کړه، دغه چارې د زندانونو چارو د سمون ادارې په مالي ملاتړ او د اړوندو باتجربه کاري ډلې له لوري په ډېره کمه موده کې په اساسي ډول بشپړې شوې، چې له امله به یې د دې مرکز د ماشومانو محجوزینو لپاره د لازمو او د پام وړ اسانتیاوو ترڅنګ، د امنیت په لا ټینګښت کې مثبته ونډه ولري.
صفر المظفر ۳/ ۱۴۴۶
د مقام د دفتر ریاست
د اطلاعاتو او عامه اړیکو امریت
