ولایتي خبرونه (ننګرهار- بادغیس- بغلان) د ننګرهار ولایت د ماشومانو د اصلاح او روزنې مرکز له محجوزینو سره د ژمنيو توکو مرسته وشوه
د ننګرهار ولایت د ماشومانو د اصلاح او روزنې مرکز سره د یونیسف له لورې د ژمنیو او نورو لازمو توکو مرسته وشوه.
په یادو مرسته شویو توکو کې، د ژمي لپاره تودې جامې، بوټونه، جمپرونه، جورابې، او داسې نور لازم توکي موجود وو، چې د یاد مرکز او د یونیسف د مسوولینو له خوا په پوره شفافیت د نوموړي مرکز په محجوزینو وويشل شول.
د یو بل خبر له مخې، د بادغیس ولایت د استخباراتو او د امر باالمعروف او نهي عن المنکر ریاستونو ګډ پلاوي د دې ولایت زندان له مسوولینو سره ولیدل او په اړوندو موضوعاتو یې ورسره خبرې وکړې
داراز، نوموړي پلاوي د دې ولایت د زندان محبوسینو او محجوزینو سره هم ولیدل او له دوی سره د مسوولینو چلند یې ښه یاد کړ چې دا کار يې د خوښۍ وړ وګرځیده او په دې تړاو یې د زندان مسوولینو څخه مننه وکړه.
بل لور بیا د بغلان ولایت په زندان کې د زندانیانو ترمنځ د ولیبال سیالۍ چې د دې ولایت د زندان مسوولینو له لوري په لاره اچول شوې وې پای ته ورسېدې.
د یاد زندان مسوولین زیاتوي :« یادې سیالۍ چې په دوستانه ډول جوړې شوې وې د څو ورځو په موده کې پای ته ورسېدې چې موخه مو ترې زندانیانو ته د سالمې فضا برابرول او ورزش ته هڅول وو».
د یادې سیالۍ په پای کې نوموړو زندانیانو د یاد زندان مسوولینو څخه مننه وکړه چې د هغوي روغتیا او د تفریح لپاره ځانګړې پاملرنه کوي او د ورزش کولو زمینه یې ورته مساعده کړې ده.
رجب المرجب- ۱۰/ ۱۴۴۵
د مقام د دفتر ریاست
د اطلاعاتو او عامه اړیکو امریت
