د زندانونو چارو د سمون ادارې نظامي مرستیال غزني ولایت ته په سفر ولاړ

محترم لوی پاسوال قاري حبیب الله "بدر" او د ادارې د مقام د سلاکار محترم مولوي اسدالله "مولانا" په ګډون مل پلاوي غزني ته د خپل سفر په ترڅ کې د یاد ولایت د زندان له مسوولینو او پرسونل سره وکتل او پر اړوندو موضوعګانو یې بحث او سلامشورې وکړې.
په ورته وخت کې، د نظامي مرستیال په مشرۍ پلاوي د غزني ولایت د زندان له زندانیانو سره ولیدل او هغوی ورسره د خپلو جرمي دوسیو پروخت څېړلو او د برخلیک روښانه کولو په اړه غوښتنې شریکې کړې، چې د پلاوي مشر ورته د رسېدنې ډاډ ورکړ.
داراز، محترم لوی پاسوال قاري حبیب الله بدر او مل پلاوي یې د دغه زندان امنیتي وضعیت له نږدې وارزاوه او د امنیت لا ښه والي لپاره یې اړوندو مسوولینو ته لازمې توصیې وکړې.
همداشان، پلاوي د غزني له عدلي او قضایي اورګانونو له مسوولینو سره ولیدل او د دغه ولایت د زندان د بندیانو یادې غوښتنې یې ورسره شریکې کړې، چې نوموړو مسوولینو ورته په دې برخه کې ډېر ژر د قانون او اصولو مطابق د زندانیانو دوسیو څېړلو او پرېکړو عملي کولو ژمنه وکړه. 
د زندانونو چارو د سمون ادارې رهبري تل هڅه کوي، څو د مرکز او ولایتونو له زندانونو او بندیانو لیدنه وکړي، وضعیت یې وارزوي او ستونزو ته یې رسېدنه وکړي.

شعبان المعظم ۲۱/ ۱۴۴۴
د مقام د دفتر ریاست
د اطلاعاتو او عامه اړیکو امریت