د زندانونو چارو د سمون ادارې یو لوړپوړي پلاوي خوست او پکتیا ولایتونو ته سفر وکړ
د زندانونو چارو د سمون ادارې د نظامي مرستیال محترم پاسوال قاري حبیب الله "بدر" په مشرۍ او د ادارې د مقام سلاکار محترم مولوي اسدالله "مولانا" په ملتیا یو پلاوي تېره شپه ناوخته خوست ته د خپل سفر پرمهال، د دغه ولایت د زندان د وضعیت د ارزونې په موخه له مسوولینو سره وکتل او پر اړوندو مسایلو، ترسره شویو فعالیتونو، بندیانو ته د وړاندې شویو خدمتونو، برابرو شویو اسانتیاوو او ستونزو په هکله خبرې اترې وکړې.
په ورته وخت کې، د زندانونو چارو د سمون ادارې نظامي مرستیال او مل پلاوي یې د خوست ولایت د زندان له زندانیانو سره ولیدل، د هغوی خبرې، ستونزې او غوښتنې یې واورېدې او د حل لپاره یې د زندان مسوولین متوجه کړل.
داراز، پلاوي د دغه زندان له اعاشوي، اباتوي، اداري، رغنیزې او امنیتي چارې له نږدې وارزولې او د لا ښه والي لپاره یې مربوطه مسوولینو ته لازمې سپارښتنې او لارښوونې وکړې.
همداشان، پلاوي د خوست له محترم مرستیال والي سره وکتل او د دې ولایت د زندان اړوند مسایل ورسره شریک کړل، چې د محترم والي له خوا ورته په ولایتي کچه د زندان د ستونزو د حل ډاډ ورکړ.
بلخوا، یاد پلاوي د پکتیا ولایت له زندانه هم لیدنه وکړه، له مسوولینو سره یې پر مربوطه موضوعګانو خبرې وکړې او له بندیانو سره یې هم د هغوی پر غوښتنو او ستونزو تر بحث وروسته د رسېدنې ژمنه وکړه.
د زندانونو چارو د سمون ادارې رهبري او مسوولین تل په دې هڅه کې دي، څو د مرکز او ولایتونو د زندانونو وضعیت له نږدې وارزوي او پرخپل وخت یې اړتیاوو ته رسېدنه وکړي.
شعبان المعظم ۱۱/ ۱۴۴۴
د اطلاعاتو او عامه اړیکو امریت
