د ا.ا.ا. ریاست الوزراء عالي مقام د اداري مرستیال په مشرۍ د تشکیلاتو او معاشونو د تنظیم کمېسیون د زندانونو چارو د تنظیم ادارې له نظامي مرستیال سره وکتل

د ا.ا.ا. د عالیقدر امیرالمؤمنین (حفظه الله) د حکم پر اساس د تشکیلاتو او معاشونو د تنظیم کمېسیون ته دنده سپارل شوې، چې د زندانونو چارو د تنظیم ادارې، اداري چارې او د زندانیانو وضعیت له نږدې وڅېړي او په اړه د مشرتابه عالي مقام (حفظه الله)  ته تفصیلي او هراړخیز معلومات ورواستوي.

په همدې موخه د ا.ا.ا. ریاست الوزراء عالي مقام د اداري مرستیال او د تشکیلاتو او معاشاتو کمېسیون مشر محترم مولوي عبدالسلام "حنفي"، چې د دې کمېسیون غړي هر یو د مخابراتو او معلوماتي ټېکنالوژۍ وزیر، محترم حاجي عبدالاحد "فضلي"، د افغانستان بانک رئیس محترم حاجي نوراحمد "اغا"، د کورنیو چارو وزارت معین ملا رحمت الله "نجیب"، د مالیې وزارت د خزاینو معین محترم حاجي عبدالقدیر "احمد" هم ورسره وو، نن(دوشنبې) د زندانونو چارو د تنظیم ادارې ته راغلی وو او د دې ادارې له نظامي مرستیال محترم لوی پاسوال الحاج محمد کاظم "طارق"، د مالي او اداري عمومي رئیس محترم الحاج مولوي عبدالهادي "مالي اخندزاده" او د مرکزي برخو یو شمېر رئیسانو او مسوولینو سره ولیدل.

محترم مولوي عبدالسلام حنفي وویل، «زمونږ د دې لیدنې لومړی هدف د دغې ادارې اړوند د مرکز او ولایتونو د زندانونو مالي، تدراکاتي، تعمیراتي، امنیتي او نورو مربوطه چارو ارزول دي او دویم هدف مو د زندانیانو د وضعیت معلومول دي.

په ورته وخت کې، د زندانونو چارو د تنظیم ادارې نظامي مرستیال محترم لوی پاسوال الحاج محمد کاظم طارق د ا.ا.ا. د عالیقدر مشرتابه (حفظه الله) په شفقت د دې کمېسیون له ټاکلو او زندانونو او د زندانیانو د وضعیت ارزولو له امله د خوښۍ په څرګندولو سره د نوموړي کمېسیون د قدرمن مشر او محترمو غړو ته د ښه راغلاست ویلو سربېره هغوی ته د زندانونو اړوندو چارو په اړه بشپړ معلومات وړاندې کړل او ډاډ یې ورکړ، چې دغه اداره د انساني اوشرعي حقونو په پام کې نیولو سره تل هڅه کوي چې ښځینه او نارینه محبوسینو، توقیفیانو او محجوزینو ماشومانو ته په زندانونو او د ماشومانو د اصلاح او روزنې په مرکزونو کې د ژوند لازمې اسانتیاوې او امکانات برابر کړي.

د نوموړي کمېسیون مشر او غړو د یادو معلوماتو په اورېدو سره وويل: «مونږ ستاسو د ادارې فعالیتونه او زندانیانو ته وړاندې کړي خدمتونونه د قدر وړ بولو، خو هڅه کوو چې په ګډه د دې فعالیتونو او خدمتونو کیفیت لا نور هم ښه کړو، ستونزې او نیمګړتیاوې په نښه، حللارې ورته پیدا او زندانونو کې د زندانیانو د اصلاح لپاره لازم او ګټور ګامونه پورته کړو».

په ورته مهال، محترم مولوي عبدالسلام حنفي په مشرۍ د تشکیلاتو او معاشاتو کمېسیون د زندانونو چارو د تنظیم ادارې له خوا په کابل کې د مرکز او (۳۳) ولایتونو د زندانونو یو شمېر رئیسانو، امرینو او امنیتي او اداري مرستیالانو ته د زندانونو د رهبرۍ، اداري نظم او د زندانیانو د سالمې ساتنې تر سرلیک لاندې د (۱۵)ورځیني سمینار له بهیر څخه لیدنه وکړله او ګډونوالو ته یې دوی د راتګ او لیدنې د موخو د څرګندولو ترڅنګ لازمې لارښوونې وکړې.

داراز، هغه زیاته کړه چې د معلوماتو له مخې، د زندانونو چارو د تنظیم ادارې، ټولې چارې او زندانیانو او مراجعینو ته وړاندې کړي خدمتونه د ستایلو وړ دي او ويې ویل،  په دې برخه کې لا نور کار ته هم اړتیا شته.

د یادونې وړ بولو، چې د ا.ا.ا. ریاست الوزراء عالي مقام اداري مرستیال محترم مولوي عبدالسلام حنفي په مشرۍ د تشکیلاتو او معاشاتو کمېسیون له خوا  د زندانونو د تنظیم ادارې د زندانونو او زندانیانو د وضعیت اروزولو اوڅېړلو بهیر چې له ځینو مرکزي برخو پیل شو، تر راتلوونکو څو ورځو پورې به د مرکز او ولایتونو په کچه دوام ولري.

محرم الحرم ۶/ ۱۴۴۸

د مقام د دفتر ریاست

د اطلاعاتو او عامه اړیکو امریت