د زندانونو چارو د تنظیم ادارې د ښوونې او بیا روزنې ریاست او د پوهنې وزارت د کابل ښار د پوهنې ریاست ترمنځ د دې ادارې ښوونیزو (دیني او عصړي) زده کړو مرکزونو ته د همکاریو جلب په موخه ناسته ترسره شوه
په یاده ناسته کې، دغې ادارې په استازیتوب د ښوونې او بیا روزنې رئیس محترم حافظ مولوي نظر محمد"ناصري"، د پوهنې وزارت په استازیتوب د کابل ښار د پوهنې رئیس محترم حافظ مولوي حسیب الله "صاحبزاده" او د یاد ریاست یو شمېر کارکوونکو هم شتون درلود، د زندانیانو د روزنې، ښوونې، د دواړو ادارو ترمنځ د همغږۍ او ګدو همکاریو په اړه بحث او خبرې وشوې.
داراز، د ښوونې او بیا روزنې رئیس له لورې په زندانونو کې د روانو ښوونیزو او روزنیزو برنامو او په یادو برخو کې د لاسته راوړنو په هکله هر اړخیز معلومات وړاندې شول، همدارنګه زندانیانو ته د دیني او عصري زده کړو د برنامو د لا معیاري کولو او په یادو زندانونو کې د ښوونځیو ، مدارسو او سواد زده کړو ټولګیو د ستونزو حل او د دواړو ادارو ترمنځ د ګډو همکاریو برخه کې د همغږۍ رامنځته کولو په موخه اړین نظرونه وړاندې شول.
په ورته وخت کې، د کابل ښار د پوهنې رئیس زندانیانو ته د ښوونیزو برنامو د لا پیاوړي کولو په برخه کې همکارۍ ته لیوالتیا و ښوده او د دغې ادارې سره یې د ښوونځیو کتابونو، قرطاسیې او د دیني مدارسو درسي موادو د همکارۍ ډاډ ورکړ.
د ناستې په پای کې، د ښوونې او بیا روزنې رئیس په زندانونو کې د پوهنې وزارت د شته همکاریو څخه قدردانی او مننې ترڅنګ یې پر دوامدارې همکارۍ ټینګار وکړ.
ذوالحجه الحرام ۲/ ۱۴۴۷
د مقام د دفتر ریاست
د اطلاعاتو د عامه اړیکو امریت
