ولایتي خبرونه: (ننګرهار، هرات، سرپل، جوزجان) د ننګرهار ولایت د زندان رئیس په مشرۍ پلاوي د دره نور ولسوالۍ د توقیفخونې څخه لیدنه وکړله
په دې لیدنه کې، د یاد زندان رئیس محترم مولوي سهیل "سعید" د نوموړې توقیفخونې اداري بهیر، اعاشوي چارې او د توقیفي بندیانو حالت له نږدې وڅېړه او د یادې توقیفخونې مسوولینو، د اړوند اداري کړنو او اعاشوي وضعیت په اړه مفصل معلومات وړاندې کړل چې نوموړي پلاوي د توقیفخونې له عمومي وضعیت څخه خوښي څرګنده کړله او د چارو د لا ښه تنظیم او اغېزمنتیا په موخه یې اړینې سپارښتنې وکړلې.
هرات:
د هرات ولایت د زندان په انګړ کې د زرغونتیا او چاپېریال ساتنې په موخه په سلګونه مثمر او غیر مثمر نیالګي ګېښودل شول
د یاد زندان رئیس محترم مولوي شراف الدین "مخلص"په وینا؛ د نیالګیو کېنول نه یوازې د چاپېریال ساتنې او ښکلا لپاره اړین دي، بلکې زندانیانو ته د طبیعت سره د مینې او مسوولیت احساس هم پیاوړی کوي.
سرپل او جوزجان:
د سرپل او جوزجان ولایتونو له زندانونو سره د اکتید موسسې له لورې د حفظ الصحې او اړتیا وړ توکو مرسته وشوه
د زندانونو چارو د سمون ادارې د اقتصادي برنامو او ستراتېژیکو اړیکو ریاست په هڅو د اکتید موسسې له لورې د یادو زندانونو له ښځینه زندانیانو او محجوزینو سره د شامپو، صابون، ځان پاک، د غاښونو برس او کریمونه او د اړتیا وړ نور توکي شامل ول، چې د نوموړو زندانونو پر محبوسینو او محجوزینو باندې د یادو ادارو د مسوولینو په حضور کې ووېشل شوه.
رمضان المبارک ۹/ ۱۴۴۷
د مقام د دفتر ریاست
د اطلاعاتو او عامه اړیکو امریت
