د زندانونو چارو د سمون ادارې د پالېسۍ او مسلکي چارو مرستیال په مشرۍ پلاوي د پکتیا ولایت له زندانه څخه د لیدنې ترڅنګ یې د نوموړي زندان د یو جومات او د ځېنو نویو جوړ شویو برخو پرانیسته وکړله
د دې ادارې د پالېسۍ او مسلکی چارو مرستیال محترم قاري محمد بلال "فاتح" په مشرۍ پلاوي پکتیا ولایت ته د سفر په ترڅ کې د نوموړي ولایت د زندان له مسوولینو سره پر اړوندو مسایلو بحث وکړ.
محترم قاري محمد بلال فاتح د یاد ولایت زندان مسوولینو سره په لیدنه کې وویل چې د خپلو امرینو اطاعت وکړئ، په چارو کې د امانت اصل په پام کې ونیسۍ، خپلو مسوولیتونو ته متوجه شئ او زندانیانو سره ښه چلند وکړئ.
په همدې حال کې د زندانونو د سمون ادارې د پالېسۍ او مسلکي چارو مرستیال محترم قاري محمد بلال فاتح چې په داسې حال کې د دې ادارې د ښوونې او روزنې رئیس محترم مولوي نظر محمد ناصري، د زندان رئیس محترم قاري عبدالغني عادل او د یاد ولایت یو شمېر سمه ییزو مسوولینو هم شتون درلود، د نوموړي زندان د ځېنو نویو جوړو شویو برخو پرانیسته وکړله.
په دغو جوړو شویو برخو کې چې یو جومات، یو میلمستون، د امنیتي او اداري غونډو لپاره یو تالار ، د اداري واحد لپاره د څلورو خونو جوړول، دوه تشنابونه، ملاقات ځای لپاره سایه بان، لوژستیک امریت لپاره د یو ساتنځای جوړول، د ۱۶۰ واټه د برېښنا ترانسپرمر نصبول او د یاد زندان د ځینو برخو ترمیم او رنګمالي شامل ول چې د نوموړي پلاوي او یو شمېر سیمه ییزو مسوولینو په حضور کې ګټې اخیستنې ته وسپارل شول.
په دې اړه جوړو شویو مراسمو کې، محترم قاري محمد بلال فاتح د نوموړي ولایت د زندان مسوولینو هڅې وستایلې او زیاته کړله چې زمونږ باید د محبوسینو لپاره مناسب چاپېریال، لازمې اسانتیاوې برابرې او اداري تاسیساتو د ساتنې په موخه نه ستړې کېدونکې هلې ځلې وکړو.
داراز، د پالېسۍ او مسلکې چارو مرستیال د نوموړي ولایت د زندان له زندانیانو سره هم ولیدل او د هغوی د ستونزو تر اورېدو وروسته یې وویل، « په زندان کې اصلاحي او روزنیز پروګرامونه دوام لري، نو هیله لرم چې له یوې خوا دا پروګرامونه په زندان کې ستاسو د اصلاح او بیا روزنې لامل شي او له بلې خوا تاسو هم ترې له بدو او ناروا کړنو څخه د ډډه کولو لپاره ګټه واخلئ او هم له بنده وروسته د یو سالم وګړي په توګه خپلې کورنۍ او ټولنې سره یو ځای شئ ».
په ورته وخت کې، د دې ولایت د زندان زندانیانو د محترم قاري محمد بلال فاتح په مشرۍ د پلاوي په ورتګ خوښي وښوده او له دوی سره د زندان د مسوولینو چلند یې ښه یاد کړ.
دغه راز، د پالېسۍ او مسلکي چارو مرستیال چارو په مشرۍ د پکتیا ولایت د توقیفخونې او ښځینه زندان څخه هم لیدنه وکړله او زندانیانو ته د لا زیاتو اسانتیاوو برابرولو په موخه اړوندو مسوولینو لازمې سپارښتنې وکړې.
د محترم قاري محمد بلال فاتح په مشرۍ پلاوي د نوموړي زندان د ډوډۍ پخولو، خوړو پخولو، او تعمیراتي او روغتیايي چارې له نږدې وارزولې او د هغو لا ښه والي او شتو ستونزو د هواري په موخه یې مربوطه مسوولینو ته لازمې سپارښتنې وکړې.
په پای کې د پکتیا ولایت سیمه ییزو مسوولینو له لورې نوموړي پلاوي ته ډالۍ هم ورکړل شوې.
رجب المرجب ۱۸/ ۱۴۴۷
د مقام د دفتر ریاست
د اطلاعاتو او عامه اړیکو امریت
